Хаартыска: Андрей Сорокин, СИА.
Дьокуускай куоракка Уһук Илин уоукурукка биир бөдөҥ култуурунай кластерыттан биирдэстэрэ – Арктикатааҕы эпос уонна ускуустуба киинэ тутулла турар. Бырайыак «ВИС» Бөлөх уонна СӨ Бырабыыталыстыбатын икки ардыларыгар судаарыстыбаннай-чааһынай партнерство туһунан сөбүлэҥинэн олоххо киирэр.
Атырдьах ыйын 6 күнүгэр, сэрэдэҕэ, эбийиэккэ үлэ хаамыытын өрөспүүбүлүкэ Ил Дархана Айсен Николаев бэрэбиэркэлээтэ. Миэстэтигэр ыытыллыбыт мунньах түмүгүнэн, кини дьиэ ис бараанын үлэтин уонна тулатын сири-уоту тупсарыыны күүһүрдэргэ сорудахтаата. Итини таһынан филармония оркестрын дьааматын оҥоруу былааныгар ураты болҕомто уурулунна.
«Эбийиэк Саха сирин визитнэй карточката буоларын, суолтатын өр сылларга сүтэрбэтин уонна өрөспүүбүлүкэ култуурата сайдарыгар кылаатын киллэрэрин туһугар, үлэ бары түһүмэхтэрин үрдүк хаачыстыбалаахтык толорууну хааччыйыахха наада», – диэн эрэгийиэн салайааччыта бэлиэтээтэ.
Мунньахха иһитиннэрбиттэринэн, эбийиэк бэлэмэ 80%-тан тахса. Тутааччылар эркиннэри тутуу үлэтин түмүктүүллэр, муостаны кутуу, эркиннэри сыбааһын үлэлэрэ ыытыллаллар, киирэр холл иһин оҥоруута саҕаланна. Ону сэргэ инженернэй ситимнэр уонна сыана анал тэриллэрэ туруоруллаллар.
«Бигэргэтиллибит бырайыакка олоҕуран, үлэ быыһыгар кэскиллээх комплекс ураты көстүүтүн күүһүрдэргэ аналлаах быһаарыныылар чуолкайданаллар. Киин функциональнай уонна символическай оруолун учуоттаан, ис өттө ситэриллэллэр», – диэн «ВИС» Бөлөх Дьокуускайдааҕы территориальнай управление салайааччыта Андрей Суслов санаатын үллэһиннэ.
Эбийиэк тулатын сиригэр-уотугар тротуардары уонна массыына сылдьар суолларын оҥороллор, Сайсары күөл кытылын киллэрэн туран, күүлэйдиир зона тэриллэр. Вертикальнай былааннааһын түмүктэнэр, тас сырдатыы элэмиэннэрэ уонна кыра архитектурнай тутуулар туруоруллаллар. 177 массыына турар парковка сирэ бэлэмнэннэ. Судаарыстыбаннай-чааһынай партнерство көмөтүнэн, бу киэҥ далааһыннаах тутуу өрөспүүбүлүкэ бүддьүөтүгэр биир кэмнээх улахан ноҕурууската суох ыытыллар.
«ВИС» бөлөх бырайыак чааһынай партнерун быһыытынан, бырайыактыыр уонна тутар кэмнэргэ бүддьүөттэн тахса үбү-харчыны тарда сылдьар. Оттон эбийиэк үлэҕэ киирбитин кэннэ, сөбүлэҥ болдьоҕо бүтүөр диэри бары инженернэй уонна сыана тэриллэрин үлэлиир туругун хааччыйыаҕа, диэн СӨ Ил Дарханын уонна Бырабыыталыстыбатын пресс-сулууспата иһитиннэрэр.
РФ Силиэстийэлиир кэмитиэтин бэрэссэдээтэлэ Александр Бастрыкин Дьокуускайга саахалланар туруктаах дьиэттэн көһөрүүгэ олохтоохтор бырааптара кэһиллибитин туһунан…
Бу күннэргэ алдьатыылаах айылҕа иэдээниттэн -- от ыйынааҕы дохсун ардах халааныттан эмсэҕэлээбит Өймөкөөн улууһун олохтоохторун…
«Мин биисинэһим» киин «Көдьүүстээх уонна күрэстэһэр кыахтаах экэниэмикэ» национальнай бырайыак чэрчитинэн олоххо киирэр «Элбэх оҕолоох…
Дьокуускай куораттааҕы силиэстийэлиир отдела итирик туруктаах сылдьан суол быраабылатын кэһэн, икки оҕо өлүүтүгэр тиэрдибит 36…
Киин куорат сөтүөлүүр сирэ сабыллыбытын туһунан Дьокуускай куорат дьаһалтата иһитиннэрэр. Онон ууга түспүт дьону быыһыыр…
«Кыталык» судаарыстыбаннай эркээйи сиргэ орнитологтар кубалаах хаас дьикти сыһыаннаһыыларын туоһулара буоллулар. Мария Владимирцева уонна Айгуль…