Ил Дархан Тыа хаһаайыстыбатын  үлэһиттэрин күнүнэн эҕэрдэтэ

Ытыктабыллаах Саха сирин агробырамыысыланнай комплексын үлэһиттэрэ уонна бэтэрээннэрэ!

Өрөспүүбүлүкэ салалтатын аатыттан уонна тус бэйэм ааппыттан эһигини РФ тыатын хаһаайыстыбатын уонна астыыр-таҥастыыр бырамыысыланнаһын үлэһиттэрин күнүнэн итиитик-истиҥник эҕэрдэлиибин!

Бу бырааһынньык – бары үлэһиттэргэ дириҥ ытыктабыл уонна махтаныы бэлиэтэ. Саамай наадалаах, бочуоттаах, айымньылаах үлэ. Эһиги тыа сирдэрин, бүтүн өрөспүүбүлүкэ сайдыытыгар дьоһуннаах кылааккытын киллэрэҕит, Саха сирин олохтоохторун хаачыстыбалаах бородууксуйанан хааччыйаҕыт.

Тыа хаһаайыстыбата өрөспүүбүлүкэҕэ – экэниэмикэ биир саамай суолталаах салаата, төрүт олохтоох нэһилиэнньэ үгэс буолбут олоҕун-дьаһаҕын төрдө. Биһиэхэ Хотугу сир тыйыс килиимэттээх усулуобуйатыгар тыа хаһаайыстыбатын сайыннарыыга уһулуччулаах уопут мунньулунна уонна  көлүөнэттэн көлүөнэҕэ харыстанан бэриллэр.

Бүгүн биһиги өрөспүүбүлүкэбит аграрийдара доҕордуу буолбатах дойдулар сааҥсыйаларын усулуобуйатыгар уустук соруктары быһаараллар уонна төрүт үгэстэргэ тирэнэн, саҥа технологиялары уонна аграрнай билим ситиһиилэрин киллэрэн, бу үлэҕэ ситиһиилэнэллэр.

Бу күннэргэ Москваҕа буола турар 27-с «Көмүс күһүн» Арассыыйатааҕы быыстапкаҕа Саха сириттэн 50-тан тахса дэлэгээт кыттар. Кинилэр ортолоругар – муниципальнай оройуоннартан тыа хаһаайыстыбатын бородууксуйатын оҥорооччулар, комплекс тэрилтэлэрин бэрэстэбиитэллэрэ, Дьокуускайдааҕы тыа хаһаайыстыбатын научнай-чинчийэр института, өрөспүүбүлүкэ агрохайысхалаах оскуолалара бааллар. Быйылгы быыстапка сүрүн тиэмэтэ – АПК көдьүүһүн үрдэтии, ол иһигэр аныгы сыыппара көмөтүнэн.

Олохтоох табаар бородууксуйатын баар кыаҕынан барытын оҥорон таһаарыы – Саха сирин тыатын хаһаайыстыбатын биир сүрүн соруга. Биһиги аграрийдарбыт иннилэригэр дьулуурдаах соруктары туруорунуохтаахтар.

2025 сыллааҕы саҥа түмүктэммит хомуур хампаанньатын түмүгүнэн, бурдук үүнүүтүн бүтүн хомуура 2024 сыл таһымыттан 67 % үрдүк. Бу кэнники сылларга бурдук рекорднай үүнүүтэ буолар. Аһаҕас халлааҥҥа буортан оҕуруот аһа 14 бырыһыанынан элбэх хомуллубут. Үүтү бэлэмнээһин кээмэйэ ааспыт сыллааҕы көрдөрүүнү 11 %-нан куоһарар. Бу – Саха сиринээҕи тыатын хаһаайыстыбатын наукатын ситиһиилэрин туһаныы уонна биһиги сирбит үлэһиттэрин үтүө үлэлэрин түмүгэ. Уонна, биллэн турар, үгүс ситиһии муниципальнай оройуоннар уонна куорат уокуруктарын тыа хаһаайыстыбатын өйүүргэ боломуочуйалара кэҥээбитин түмүгэр кыаллыбыта. Быйыл муниципалитеттарга бэриллибит боломуочуйалар чэрчитинэн салааҕа судаарыстыба өйөбүлэ 8,9 млрд солкуобайтан тахсыа, бу ааспыт сыллааҕы кээмэйтэн 17%-нан үрдүк.

Өрөспүүбүлүкэҕэ 70-тан тахса кыра кыамталаах саҥа таҥастыыр эбийиэк тутуллуоҕа, 30-тан тахса үлэлии турар эбийиэккэ саҥардыы уонна өрөмүөн ыытыллыаҕа. Ол курдук, балаҕан ыйыгар Дьокуускайдааҕы көтөр фабрикатын комбикорм сыаҕын саҥардан оҥоруу иккис уочарата үлэҕэ киирдэ. Кини сылга 27 тыһыынча туоннаҕа диэри аһылыгы оҥорон таһаарар кыамталаах, бу өрөспүүбүлүкэ бары көтөр фабрикаларын толору хааччыйарга кыах биэриэҕэ.

Биһиги инникитин да өрөспүүбүлүкэ тыатын хаһаайыстыбатын уонна астыыр-таҥастыыр бырамыысыланнаһын өйүөхпүт. Бу барыта сүрүн стратегическай сыалы ситиһэргэ туһуланар – 2030 сылга диэри тыа хаһаайыстыбатын бородууксуйатын оҥоруутун бүтүн бородууксуйатын уопсай кээмэйигэр 53,5-тан 70%-ҥа тиэрдии.

Бары бииргэ кыттыһан, эрэгийиэн аграрнай секторын күрэстэһэр кыаҕын күүһүрдэр соруктары барытын быһаарыахпыт диэн эрэнбин. Бу – тыа олохтоохторун олоҕун таһымын уонна хаачыстыбатын үрдэтии буолар.

Күндү биһиги үлэһиттэрбит! Бу бырааһынньык күн эһиэхэ таһаарыылаах үлэҕит иһин махталбын тиэрдэбин. Эһиэхэ эйэни уонна үтүөнү, чэгиэн доруобуйаны уонна уостубат эрчими, ситиһиини, этэҥҥэ буолууну уонна төрөөбүт өрөспүүбүлүкэбит, Улуу Арассыыйа чэчирии сайдарын туһугар саҥа ситиһиилэри баҕарабын!

Саха Өрөспүүбүлүкэтин Ил Дархана А.С. Николаев

 Скопировать