Ил Дархан түөрт Дьоруой дойдутун – Танда сэлиэнньэтин сайдыытын хаамыытын сыаналаата

СӨИл Дархана Айсен Николаев Арассыыйа Дьоруойа Алексей Неустроевы уонна Уус Алдан улууһун Байаҕантай нэһилиэгин баһылыга Савва Егоровы кытта көрүстэ.

Кинилэр түөрт Дьоруой төрөөбүт дойдутун – Танда сэлиэнньэтин сайдыытын кэскилин ырыттылар. «Арассыыйа Дьоруойун кытта көрсүһүү мэлдьи ураты суолталаах түгэн. Алексей Неустроев – хорсун быһыы, эппиэтинэс уонна төрөөбүт дойдуга бэриниилээх буолуу холобура. Арассыыйа Бырабыыталыстыбатын иһинэн Үп университетыгар үөрэнэрин үрдүнэн, кини нэһилиэк олоҕор көхтөөхтүк кыттар, суолталаах боппуруостары туруорсар, дьоҥҥо көмөлөһөр. Алексейга кыһамньылаах сыһыанын уонна өйөбүлүн иһин махтанабын», — диэн Айсен Николаев бэлиэтээтэ.

Нэһилиэк баһылыга Савва Егоров «Бороҕон – Танда» суолун хапытаалынай өрөмүөнүн хаамыытын туһунан дакылааттаата. Билиҥҥи туругунан түөрт килэмиэтир номнуо өрөмүөннэннэ, онуоха инникитин өссө да элбэх үлэ толоруллуохтаах. Суолу саҥардан оҥоруу 2027 сылга толору түмүктэниэҕэ диэн былааннанар. Ону таһынан, от үлэтин боппуруостара таарылыннылар: уһуннук түспүт ардахтартан үөскээбит ыарахаттары үрдүнэн үлэ салҕанар, уонна улуус ирдэнэр аһылык саппааһын оҥорорго бары кыһамньытын уурар. Анатолий Заболоцкай аатынан успуорт саалатын тутуутугар ураты болҕомто уурулунна. Бу эбийиэккэ үлэ номнуо саҕаланна, ол эрээри салгыы тутарга эбии үбүлээһин ирдэнэр. Бу успуорт саалата ыччакка уонна сэлиэнньэ кэскилигэр улахан суолталаах. Ону таһынан, киин хочуолунайы саҥардан оҥоруу салҕанар, чааһынай сектор ититии ситимигэр холбонуутун бырайыага оҥоһулунна.