Ил Дархан түмүктэнэллэрэ чугаһаабыт эбийиэктэр тутууларын хонтуруоллааһыны күүһүрдэргэ сорудахтаата

Ил Дархан Айсен Николаев алтынньы 14 күнүгэр  СӨ бырабыыталыстыбатын уонна дьаһалтатын  салайыыларынан нэдиэлэ аайы ыытыллар мунньахха  үлэҕэ киллэрэргэ былааннаммыт эбийиэктэр тутууларын хонтуруоллааһыны күүһүрдүргэ дьаһайда.

Тутуу кэмэ түмүктэнэрэ чугаһаабытынан сибээстээн, Ил Дархан түмүктэнэллэрэ чугаһаабыт эбийиэктэргэ  кыһыҥҥы кэмҥэ ис үлэлэри ыытар кыах баар буоларын туһугар,  болҕомтону онно туһаайарга ыйда.

«Өрөспүүбүлүкэ бырабыыталыстыбата Судаарыстыбаннай мунньаҕы кытары бүддьүөт бырайыагын сүрүн хайысхаларыгар сыһыаннаах боппуруостарга сүрүннээх үлэни ыытыахтаах”, — диэн Айсен Николаев бэлиэтээн эттэ.

Кини 2025 сылга РФ федеральнай бүддьүөтүн бырайыагар киллэрэргэ өрөспүүбүлүкэ сайаапкаларын (саҥа национальнай бырайыактары учуоттаан) оҥоруу наадатын эмиэ ыйда.