Ил Дархан Учуутал күнүнэн эҕэрдэтэ

Күндү учууталлар! Ытыктабыллаах педагогическай үлэ бэтэрээннэрэ!

Саха Өрөспүүбүлүкэтин салалтатын уонна тус бэйэм ааппыттан эһигини Учуутал күнүнэн эҕэрдэлиибин!

Бүгүн биһиги бүтүн норуот дьиҥнээх бырааһынньыгын бэлиэтиибит. Бука бары бастакы учууталбытыгар, ииппит-такайбыт настаабынньыктарбытыгар махтанабыт!

Ылбыт билиибитин иҥэринэн илдьэ сылдьабыт, биһиэхэ аан дойдуну билэргэ, толкуйдуу үөрэнэргэ, уопсастыбаҕа толору бырааптаах киһи буоларга көмөлөһөр. Биһиги учууталларбыт араас дьиссипи­лиинэлэргэ билиини-көрүүнү биэрэллэрин таһынан биһигини Арассыыйа дьиҥнээх гражданнара, улуу Ийэ дойдубут патриоттара буоларга үөрэтэллэр.

2023 сыл Арассыыйа Федерациятын Бэрэсидьиэнин ыйааҕынан Педагог уонна настаабынньык сылынан биллэриллибитэ. Бу чиэһигэр өрөспүүбүлүкэҕэ сүүһүнэн тэрээһиннэр буолаллар, 100 тыһыынча солкуобайдаах бириэмийэ олохтонон, ону оройуоннар уонна куораттардааҕы уокуруктар олохтоохторо үтүөлэрин-өҥөлөрүн биһирээбит 36 педагог ылар.

Үчүгэй үөрэх бэйэлэрин үтүөнү тустүүр идэлэригэр муҥура суох бэриниилээх, оҕолору ис сүрэхтэриттэн таптыыр, муударай уонна үтүө санаалаах дьонтон тутулук­таах. Бүгүн Саха сирин үөрэҕин тиһигэр 30 тыһыынчаттан тахса педагог үлэлиир.

Кинилэр идэлэригэр айымньылаах үлэлэрин ситиһиилээхтик олоххо киллэрэллэрин туһугар өрөспүүбүлүкэҕэ үөрэх үлэһиттэрин өйүүргэ кэккэ миэрэлэр ылылыннылар.  Ол курдук, 2021 сылтан эрэгийиэҥҥэ Арктика уонна хотугу улуустар тыа сирин оскуолаларын педагогическай үлэһиттэрин дьиэнэн-уотунан хааччыйыы сөргүтүлүннэ.  2022 сылга олорор усулуобуйаларын тупсарыыга судаарыстыба өйөбүлүн 21 учуутал ылбыта, кинилэргэ хас биирдиилэригэр 2,5 мөл. солкуобайдаах социальнай төлөбүр көрүллүбүтэ. “Арктика учуутала” бырайыагынан кэнники сылларга Арктика оройуоннарын үөрэх тэрилтэлэригэр 181 эдэр исписэлиис үлэлии тиийбитэ.

Маны сэргэ Саха сирин бырабыыталыстыбата судаарыстыбаннай уонна муниципальнай үөрэх тэрилтэлэригэр үс сыл­лаах дуогабары түһэрсибит бары эдэр педагогтарга аадырыстаах көмөнү биэрии бэрээдэгин бигэргэппитэ.  Эдэр исписэлиис­тэр үс ыйдаах (ежемесячных) акы­лаат кээмэйдээх  подъемнайдары ылыахтара, ону тэҥэ кинилэргэ үлэлии тиийэр сирдэригэр айаннарын төлөбүрүн толуйуохтара.

“Үөрэхтээһин” национальнай быра­йыагы олоххо киллэрии көмөтүнэн Саха сиригэр сир-сир аайы  аныгылыы саҥа оскуолалар тутуллаллар, үгүс үөрэх тэрилтэлэригэр хапытаалынай өрөмүөн ыытыллар. Биэс сыл устата 64 оскуола тутулунна, быйыл өссө 14 оскуола  үлэҕэ киириэҕэ.

Бу барыта биһиги кэлэр кэскилбит, өрөспүүбүлүкэбит үүнэр көлүөнэтин туһугар оҥоһуллар, уонна, дьэ, эһигиттэн, ытыкт­абыллаах педагогтар, киһи уонна гражданин олоххо бигэтик туруута саҕаланар!

Күндү учууталлар, эһиэхэ ис сүрэхпиттэн чэгиэн доруобуйаны, этэҥҥэ буолууну, үөрэхтээһин эйгэтигэр ситиһиилэри уонна махталлаах үөрэнээччилэри баҕарабын!

Айсен Николаев,  Саха Өрөспүүбүлүкэтин Ил Дархана.