Ил Дархан уонна Дьокуускай куорат баһылыга куорат маастар-былаанын туһунан кэпсэттилэр

Кэпсэтии биир сүрүн тиэмэтинэн РФ Бэрэсидьиэнэ Владимир Путин бигэргэппит куорат маастар-былаанын олоххо киллэрии буолла.

Маастар-былаан иитинэн, соторутааҕыта саҥардыллыбыт Ленин болуоссатын үөрүүлээх быһыыга-майгыга арыйыы буолбута. Ити кэнниттэн өссө икки уопсастыбаннай миэстэни арыйыахтара — Роман Дмитриев аатынан биэрэк кытылын уонна Сайсары  күөл кытылын. Мэр Евгений Григорьев  Ил Дархан Айсен Николаевка үлэлэр түмүктэнэн эрэллэрин, сэтинньигэ туттарыллыахтаахтарын эттэ.

Маны таһынан, өссө биир тиэмэнэн «Куттала суох хаачыстыбалаах суоллар» национальнай бырайыагы олоххо киллэрии туһунан кэпсэтии буолла. Бу үлэ иитинэн куоракка 36,5 км суол-иис киллэриллэрэ күүтүллэр. Ааспыт сылларга ыытыллыбыт үлэлэри  учуоттаан, бу куорат суолун 80 бырыһыанын нуорумаҕа эппиэттиир турукка тиэрдиэҕэ диэн этиллэр.

Санатан эттэххэ, Сайсары күөл кытылын тупсаран оҥоруунан манна тулата барыта тупсарыллыа, оҕо оонньуур уонна спортивнай былаһааккалара, уопсастыбаннай тырааныспар тохтобула, бэлисипиэтинэн сылдьар ыллык, уо.д.а. баар буолуохтара.

Оттон Роман Дмитриев аатынан биэрэги саҥардан оҥорууга дьон-сэргэ дуоһуйа сынньанар сирэ тэриллиэхтээх, сатыы сылдьарга суол-иис оҥоһуллуохтаах, бэлисипиэтинэн сылдьар ыллык, ону сэргэ сайыҥҥы сөтүөлүүр сир тупсарыллыахтаах. Маны таһынан, уулусса-суол ситимин тупсарыыга, күрүө-хаһаа оҥоруутугар, оптуобустар павильоннарын оҥорууга, өрөмүөҥҥэ үлэ ыытыллыа.

СӨ Ил Дарханын уонна Бырабыыталыстыбатын пресс-сулууспата