Ил Дархан уопсастыбаннай бырайыактар ааптардарын кытта көрүстэ

— Эһиги бырайыактаргыт бары эйгэҕэ ыччат сайдыытын, патриотизмы, үтүө үгэстэри  тарҕатыыны кытта ыкса сибээстээхтэр. Онон айар куттаах дьон бэйэҕит кэскилгитин төрөөбүт дойдугутун кытта ыкса сибээстиигит, – диэн бэлиэтээтэ Ил Дархан.

Көрсүһүү кэмигэр олоҕу хамсатар эдэр, талааннаах дьон өрөспүүбүлүкэ Аҕа баһылыгар Айсен Николаевка мультипликационнай киинэни сайыннарыыга, Ийэ дойдуга бэриниилээх буолууга туһуламмыт документальнай киинэлэри оҥорууга, Уһуйааччы сылынан сибээстээн, хотугу улуустар нэһилиэктэринэн сылдьан, лиэксийэлээх туурдары тэрийиигэ, креативнай кылаастырга  продюсерскай киини арыйыы курдук этиилэри киллэрдилэр. Маны таһынан, санаа атастаһыытыгар биллэр-көстөр бырайыактардаах  Вячеслав Романов (Панда Саха), Матрена Евсеева (Motokyo), Владлена Бурнашева (Сахая), Алексей Михайлов (Леха Мотор), Вячеслав Бродников (Клевая рыбалка), Афанасий Слепцов (Эвен Life), Максим Ю-Ци-Фа (Бай балалай), Евгения Щукина (evgeshka) кыттыыны ыллылар.

— Олус интэриэһинэй кэпсэтии таҕыста. Сонун сүүрээннэри саҕар этиилэри истэн үөрдүм. Бу идиэйэлэргитин хайаан да өйүөхпүт уонна онно сөптөөх усулуобйаны тэрийиэхпит, — диэн санаатын үллэһиннэ Аҕа баһылык.

— Бүгүҥҥү көрсүһүүттэн үгүһү биллим. Бу кластер устуудьуйатыгар ырыабын уһултарыахпын баҕардым. Араас өйөбүл оҥоһулларын истэн, айыахпын-тутуохпун баҕардым. Айсен Николаевтыын аан бастаан көрүстүм.  Ыччаты өйүүрүн билэн, наһаа үөрдүм, – диэн бэлиэтээтэ Аина Ильина-KAKITOKA.