Ил Дархан Узбекистан Өрөспүүбүлүкэтин туризмҥа кэмитиэтин бастакы солбуйааччытын кытта көрүстэ

Айсен Николаев Саха сиригэр Узбекистан туризмын билиһиннэриитинэн кэлбит Узбекистан Өрөспүүбүлүкэтин туризмын кэмитиэтин Бэрэссэдээтэлин бастакы солбуйааччы Джамшид Абдусаламовы кытта оробуочай көрсүһүүнү ыытта.

«Эһиги сырыыгыт Саха сирин кытары Узбекистан Өрөспүүбүлүкэтэ эргиэн-экэнэмиичэскэй уонна култуурунай-гуманитарнай сибээстэрин, ону тэҥэ туристическай кыахтарын хардарыта сайыннарыыга улахан хардыынан буолуоҕа», — диэтэ Айсен Николаев.

Ил Дархан ювелирнай салааҕа, тыа хаһаайыстыбатын бородууксуйатын оҥорон таһаарыыга уонна эрэгийиэннэр икки ардыларынааҕы бииргэ үлэлээһиҥҥэ бырайыактары олоххо киллэрии кэскиллээҕин бэлиэтээтэ. Онуоха эрэгийиэн салайааччыта Саха сирин ураты айылҕалааҕын, кэрэ көстүүлэринэн аатырар улахан туристическай кыахтааҕын, национальнай култуура уонна этнография өттүнэн уратыларын бэлиэтээтэ.

Джамшид Абдусаламов туризм эйгэтигэр Узбекистан улахан историческай уонна култуурунай кыахтааҕын бэлиэтээтэ.

«Биһиги судаарыстыбабыт баһылыга Шавкат Миромонович Мирзиёев туризмы национальнай экэниэмикэ драйверынан ааттаабыта. Билигин туристары тардыыга кэккэ тэрээһиннэри ыытабыт. Туризм уобалаһыгар Российскай Федерацияны кытта үлэҕэ «Мир» бырагыраамаҕа Владимир Владимирович Путин кэлэ сылдьан илии баттаабыта. Биһиги былырыыҥҥыттан Российскай Федерация туристическай кыаҕын олоххо киллэриигэ кэккэ тэрээһиннэри ыытан саҕалаабыппыт. Российскай Федерацияҕа Узбекистан сыла биллэриллибитэ. Биһиги былырыын Владивостокка, Хабаровскайга, Новосибирскайга, Москваҕа, Санкт-Петербурга сырыттыбыт. Быйыл эһиги ыҥырыыгытынан Саха сирин таллыбыт», — диэтэ Джамшид Абдусаламов.

Көрсүһүүгэ Саха сирин уонна Узбекистан Өрөспүүбүлүкэтин икки ардыларыгар бииргэ үлэлээһиҥҥэ кэскиллээх хайысхалар дьүүллэһилиннилэр. Айсен Николаев ювелирнай салааҕа, култуура, мэдиссиинэ уонна туризм салааларыгар холбоһуктаах бырайыактары олоххо киллэриигэ Джамшид Абдусаламов этиитин өйөөтө. Кэскиллээх боппуруоһунан устудьуоннарга уонна оскуолаларга туризмы тэрийии буолар. Ол курдук, бырабыыталыстыба ааспыт сылга олорор дьиэ ороскуотун 20 %-нын толуйууга уонна Арассыыйа устудьуоннарыгар туристическай эбийиэктэргэ сылдьыыларын туһунан уураах таһаарбыта. Джамшид Абдусаламов Узбекистан этноуспуордун Ассоциациятын солбуйааччыта буоларынан, икки сылга биирдэ ыытыллар аан дойдутааҕы этнобэстибээлгэ саха спортсменнарын ыҥырда.

Санатан эттэххэ, ааспыт сылга Узбекистан уонна Саха сирин икки ардыларыгар атыы-эргиэн эргиирэ 2 мөл.долларга тэҥнэспитэ уонна салгыы үүнэр туруктаах.

Былырыын Узбекистаҥҥа сылдьыбыт омук туристарын ахсаана 10,2 мөл. кэриҥэ киһи буолбут, олортон 850 тыһыынча киһи — Российскай Федерация гражданнара. Быйыл Арассыыйаттан 1 мөл. тахса ыалдьыт кэлэрэ күүтүллэр.