Ил Дархан Волонтер күнүнэн эҕэрдэлээтэ

Ахсынньы 5 күнүгэр Арассыыйаҕа Волонтер күнэ бэлиэтэнэр. Ил Дархан Айсен Николаев эҕэрдэтин тиэртэ.

Ытыктабыллаах волонтердар, актыбыыстар уонна уопсастыбанньыктар!

Волонтер күнүнэн итиитик-истиҥник эҕэрдэлиибин! Бу бырааһынньык биһиги дойдубутугар 2017 сылтан, Арассыыйа бэрэсидьиэнэ Владимир Путин Волонтер күнүн олохтуур туһунан ыйааҕынан  бэлиэтэнэр буолбута. Кыһамньылаах, амарах санаалаах дьон бырааһынньыга. Бастакынан көмө илиитин уунар уонна көрүүгэ-истиигэ, болҕомтоҕо наадыйар дьону өйүүргэ бэйэлэрин харыстаммакка үлэлиир дьону бэлиэтиир.

Күн бүгүн Саха сиригэр 75 тыһыынчаттан тахса киһи бэйэтин волонтерынан киэн тутта ааттыыр. Кинилэргэ дьоҥҥо көмөлөһүү  үгэскэ кубулуйда. Добро.рф платформаҕа Саха сириттэн 40 тыһыынчаттан тахса киһи регистрацияламмыта.   Быйыл, биир сыл иһигэр биһиги волонтердарбыт ахсааннара 7000-нан эбилиннэ,  2025 сылга кинилэр бары хайысханан 1000-тан тахса улахан суолталаах тэрээһиннэри уонна араас бырайыактары ыыттылар. Ыччат элбээн иһэрэ, көхтөөх гражданскай оруолу ылара киһини үөрдэр.

«Добро.Центр» уопсастыбаннай сайдыы кииннэрэ бары улуустарга аһыллан, ситиһиилээхтик үлэлииллэр. Манна ким баҕарар волонтер буолан, социальнай бырайыагын олоххо киллэриигэ идэтийбит көмөнү, өйөбүлү ылан, биир санаалаах дьон хамаандатын булуон сөп. Бу көмөлөһүөн уонна аан дойдуну үчүгэй өттүгэр уларытыан баҕалаах дьоҥҥо кыахтарын кэҥэтэр.

Биһиги волонтердарбыт күннээҕи дьоруойдар, уопсай дьыала туһугар ханнык баҕарар ыарахаттары, мэһэйдэри туоруур кыахтаахтар. «Кыайыы волонтердара», «Култуура волонтердара», #МЫВМЕСТЕ, «Волонтёры-медики» өрөспүүбүлүкэтээҕи пуорумнар араас көлүөнэ, араас идэлээх энтузиастары түмэллэр. Волонтердар көҕүлээһиннэринэн өрөспүүбүлүкэбит күүһүрэн, түмсүүлээх буолан иһэр.

Анал байыаннай эпэрээссийэҕэ кыттыбыт байыастарбытыгар гуманитарнай көмөнү хомуйууну уонна тиэрдиини «Якутия с тобой» уопсастыбаннай тэрилтэ тэрийэр. Кинилэр кыһамньыларынан 2022 сылтан ыла 123 туоннаттан тахса таһаҕас хомуллан анал байыаннай дьайыыга ыытыллыбыт, 3200-тэн тахса баһыылка тиэрдиллибит, 883 байыаннай сулууспалаахтар дьиэ кэргэттэрэ өйөбүлү ылбыт.

«Якутия с вами», «Боевые шелкопряды Якутии», «Добровольцы Якутии», «Внуки Победителей», «Илии сылааһа», «Волонтеры Саха», уо.д.а. — биһиги хас биирдиигитин сыаналыыбыт, киэн туттабыт.

Волонтер күнүн чиэһигэр Нерюнгрига бэҕэһээ «Кыайыыга бииргэ!» диэн волонтердар пуорумнара аһылынна. Тэрээһин ахсынньы 25 күнүгэр өрөспүүбүлүкэбит киин куоратыгар түмүктэниэҕэ. Пуорум кыттыылаахтара уопуттарын үллэстиэхтэрэ уонна көмөнү хайдах өссө көдьүүстээх оҥорор туһунан ырытыахтара.

Волонтердар хамсааһыннарын кыттыылаахтарынан киэн туттабыт, тоҕо диэтэххэ, эһиги биһиги норуоппут бастыҥ хаачыстыбаларын: хорсун санааны, аһыныгас буолууну, көмөлөһөр баҕаны сөргүттүгүт. Эһиги күүскүт биһигини инники барарга, киһилии майгылаах, үтүө санаалаах буоларга угуйар.

Эһиги үтүө соруккут өрүү өрөспүүбүлүкэ хас биирдии олохтооҕун истиҥ иэйиитинэн, ис сүрэхтэн махталынан тирэхтээх буоллун!