Ил Дархан Үөһээ Бүлүүгэ уоту утары охсуһааччылары көрүстэ

Үөһээ Бүлүү улууһугар бүгүҥҥү иһитиннэриинэн алта ойуур баһаара баар. Уот хаппыт уопсай иэнэ 113 тыһ. гектартан тахса.
Балаһыанньа уустугуруута ардах суоҕуттан уонна тыалтан буоларын Ил Дархан бэлиэтиир.

—Үөһээ Бүлүү улууһугар баһаарынан балаһыанньа судургута суох. Сайын устатыгар күүстээх ардах түспэтэ, ордук хоту улуустарга. Ардах суоҕа, кураан уонна тыал уот тарҕаныытын биричиинэтинэн буолла. Бары кэриэтэ баһаардар нэһилиэнньэлээх пууннарга чугаһаабыттара эрээри, миэрэлэр суһаллык ылылланнар уонна бииргэ түмсүүлээх үлэнэн биир да сэлиэнньэ эмсэҕэлээбэтэ. Хас да баһаар бу күннэргэ умулларылла, — диэтэ Айсен Николаев.
Ил Дархан Бүлүү кыраныыссатыгар үлэлии сылдьар уоту утары охсуһааччылары көрүстэ. Уот Тиэрбэстэн баһы холуйан 10  км. сиргэ баар. Нэһилиэнньэлээх пууҥҥа куттал суоһаабат.
Манна уоту умуруорууга 100-тэн тахса киһи үлэлиир. Айсен Николаев сылдьыбыт учаастагар, уоту умуруорууга алта парашютист уонна олохтоох дьон бааллар.

Күүстээх тыалтан уот минерализованнай балаһаны ааһа түспүт, үрдүк күүрүүлээх лиинийэни сиэбит. Ол түмүгэр Бүлүүгэ түөрт нэһилиэнньэлээх пуун уота суох хаалбыт — Тылгыны, 1  Күүлэт, 2  Күүлэт, Үгүлээт. Ил Дархан Быракаантан уонна Өргүөттэн 200  кВт кыамталаах икки дизельнэй генераторы аҕалыыны түргэтэтэргэ уонна уот лииньийэтин чөлүгэр түһэрэргэ үлэ ыытылла охсоругар соруйда.

Үөһээ Бүлүүгэ Айсен Николаев ыксаллаах быһыыны-майгыны сэрэтэр, туоратар итиэннэ баһаартан куттал суох буолуутун хааччыйар хамыыһыйа мунньаҕын ыытта. Кини Үөһээ Бүлүү улууһугар ойуур баһаарын утары үлэҕэ күүһү улаатыннарарга соруйда. Баһаарынайдар ахсааннарын Горнайга эмиэ элбэтэргэ эттэ. Онно биир баһаар Бэрдьигэстээх чугаһыгар баар. Бүлүү бөлөх улуустарыттан уратыта диэн, Горнайга ардах түһэн уоту арыый мөлтөппүтэ.

Кэнники хонукка ардах Өлүөхүмэ улууһугар бэлиэтэммитэ. Онно 20  ойуур баһаара (уот хаппыт иэнэ 200 тыһ.на) баар.

Өрөспүүбүлүкэ сиригэр-уотугар уопсайа 70 ойуур баһаара бэлиэтэнэр. Уот хаппыт уопсай иэнэ 550 тыһ. га. Итинтэн 6 бохсуллубут (уот хаппыт иэнэ 31 тыһ. га). Уоту умуруорууга 1,5 тыһ. тахса киһи үлэлиир. 130 тиэхиньикэни туһаналлар. Уоту умуруорууга уонна кэтээн көрүүгэ салгын аала үлэтин салгыыр.

СӨ Ил Дарханын уонна Бырабыыталыстыбатын пресс-сулууспата

Хаартыскаҕа Андрей Сорокин түһэриитэ, СИА