Ил Дархан Айсен Николаев «Манчаары оонньуулара» успуорт төрүт көрүҥнэригэр XXII Спартакиадатын арыллыытынан эҕэрдэтэ

Күндү Сахам сирин олохтоохторо! Ытыктабыллаах «Манчаары оонньуулара» успуорт төрүт көрүҥнэригэр XXII Спартакиадатын кыттыылаахтара, тэрийээччилэрэ уонна ыалдьыттара!

Саха Өрөспүүбүлүкэтин салалтатын уонна тус бэйэм ааппыттан күрэхтэһии арыллыытынан ис сүрэхпиттэн эҕэрдэлиибин!

Манчаары оонньуулара – норуот үгэһин, күрэхтэһээччи сатабылын уонна сомоҕолоһуу тыынын илдьэ сылдьар бырааһынньык. Бу тэрээһин успуорт төрүт көрүҥнэрин тарҕатыыга, саха норуотун култууратын үйэтитиигэ, чөл олоҕу бөҕөргөтүүгэ уонна ыччаты патриотизм тыыныгар итиигэ сүҥкэн оруоллаах.

Бүгүн Манчаары оонньуулара ураты суолталаах. 2021 сыллаахха Горнай оройуонугар буолан ааспыт XXI Спартакиада пандемия уустук кэмигэр ыытыллыбыта. Санитарнай эпидимиологическай хааччахтааһыннар баалларынан сибээстээн, күрэхтэһии көрөөччүтэ суох буолбута, ол бырааһынньык тыыныгар дьайбыта саарбаҕа суох. Ол эрээри, онно биһиги уустук да кэмҥэ үгэспитин тутуһар уонна салгыыр кыахтаахпытын көрдөрбүппүт. Оттон быйыл, 2025 сылга, трибуналар көрөөччүлэри күүтэллэр. Дьон кыайыыгын тэҥҥэ үллэстэр үөрүүтэ, өйүүр саҥата ураты, туохха да тэҥнэммэт буоллаҕа.

Таатта улууһугар Оонньууларга бэлэмнэнэн улахан үлэ ыытылынна. Успуорт саҥа эбийиэктэрэ тутулуннулар, дьон тоҕуоруһар сирэ-уота тупсарылынна, наадалаах инфраструктура толору хааччылынна. Күрэхтэһиини үрдүк таһымнаахтык тэрийэргэ дьулуһабыт. Оттон саамай сүрүнэ – улуус олохтоохторо успуорка сыл бастыҥ тэрээһинин кыттыылаахтарын уонна ыалдьыттарын үөрэ көрсөргө толору бэлэмнэр.

Оонньуу киин түһүлгэтинэн – биир тыһыынча көрөөччүнү батарар кыахтаах саҥа аһаҕас стадион буолар. Бу стадиоҥҥа чэпчэки атлетика ядрота, сүүрэр дорожка, ыстаҥа уонна быраҕыы сиэктэрэ, ону тэҥэ саха норуотун успуорт төрүт көрүҥнэринэн дьарыктанар анал былаһаакка бааллар. Иккис улахан суолталаах эбийиэгинэн 8 тыһыынчаттан тахса квадратнай миэтэрэ иэннээх сабыылаах успуорт саалата буолар. Манна оонньуур хонуу, трибуналар, уларыттар хостор, тириэньэрдэр хосторо уонна чөлгө түһэр блок үлэлиэхтэрэ. Бу комплекс үлэҕэ киирэн Оонньуулар күн-дьыл туругуттан тутулуга суох, мас тардыһыытыгар, хапсаҕайга, хотугу многоборьеҕа, успуорт атын да көрүҥнэригэр тупсаҕай усулуобуйаҕа ыытыллыахтара.

Дойду салалтата болҕомтотун уурарын уонна өйүүрүн быһыытынан өрөспүүбүлүкэбитигэр успуорт инфраструктурата тэтимнээхтик сайдар. Россия Федерациятын Президенэ Владимир Владимирович Путин маассабай уонна оҕо-ыччат успуордун сайыннарар, физическэй култуура төрүт көрүҥнэрин үйэтитэр тумус тутуллуохтааҕын бэлиэтээн этэр. Судаарыстыба баһылыгын көҕүлээһининэн Россия бары субъектарыгар, ол иһигэр Саха сиригэр, аныгы успуорт эбийиэктэрэ тутуллан үлэҕэ киирэллэр, эдэр спортсменнары өйүүр уонна чөл олоҕу тутуһууну биһириир анал бырагыраамалар бааллар. Саха сирэ национальнай бырайыактарга уонна федеральнай бырагыраамаларга кыттыыта үрдүк таһымнаах күрэхтэһиилэри тэрийэр эрэ буолбакка, кэнэҕэски ыччаппытыгар бигэ тирэҕи хаалларар кыаҕы биэрэр.

Бүгүн Таатта улууһа өрөспүүбүлүкэ успуорду таптааччыларын угуйар, ыҥырар сиринэн буолла. Манчаары оонньуулара күрэхтэһии эрэ буолбатах. Бу – тулуур, дьулуур, төрүт үгэстэрбитигэр уонна култуурабытыгар ытыктабыл оскуолата. Саха сирин бары улуустара кыттыылаах күүс, сатабыл, сомоҕолоһуу бырааһынньыга. Бүгүн биһиги успуорт түмэ тардар, кыах биэрэр уонна сомоҕолоһуубутун бөҕөргөтөр күүһүн туоһулара буолабыт.

Күрэхтэһиилэр кыттыылаахтарыгар эрэли, кыайыыга дьулуһууну уонна көрөөччүлэри астыннарар хапсыһыылары, судьуйаларга уонна тириэньэрдэргэ – ситиһиилээх уонна кырдьыгы тутуһар үлэни, көрөөччүлэргэ – чаҕылхай оонньуулары уонна төрөөбүт өрөспүүбүлүкэбитинэн киэн туттууну баҕарабын. XXII Манчаары оонньуулара умнуллубат түгэннэри бэлэхтээтиннэр уонна успуорт төрүт көрүҥнэрин сайдыытыгар өссө биир эрэллээх хардыынан буоллуннар!

Саха Өрөспүүбүлүкэтин Ил Дархана  Айсен Николаев