Ил Дархан Амма аатырбыт күрэсчиттэрин кытта көрүстэ

СӨ Ил Дархана Айсен Николаев Амма улууһугар оробуочай сырыытын кэмигэр мас-рестлинг спортивнай саалатыгар сылдьан, бу көрүҥҥэ өрөспүүбүлүкэтээҕи федерация бэрэсидьиэнин, «Давидофф» сылгы собуотун генеральнай дириэктэрин Анатолий Баишевы уонна 2025 сыллааҕы Дыгын оонньууларын кыайыылааҕын, Манчаары оонньууларын абсолютнай чөмпүйүөнүн Борис Сдвижковы кытта көрүстэ.

Көрсүһүүгэ Саха сиригэр мас-рестлинг сайдыытын, төрүт успуорт көрүҥнэрин сайыннарыыга бырайыактары өйөөһүнү, оҕолору уонна ыччаты физкултууранан уонна успуордунан дьарыктаныыга тардыыны дьүүллэстилэр. Айсен Николаев үтүөлээх күрэсчиттэр көҕүлээһиннэрэ олус суолталааҕын бэлиэтээтэ, тоҕо диэтэххэ, кинилэр үүнэр көлүөнэни чөл олоххо уһуйаллар.

Анатолий Баишев мас-рестлинг саалата 2025 сыл сааһыгар тутуллан, үлэҕэ киирбитин туһунан кэпсээтэ. Бырайыак кини доҕотторун уонна иитиллээччилэрин — өрөспүүбүлүкэтээҕи, бүтүн Арассыыйатааҕы уонна аан дойдутааҕы таһымнарга үрдүк ситиһиилэри ылбыт күрэсчиттэр өйөбүллэринэн олоххо киирбит. Бүгүн саала мас-рестлининэн дьарыктаныан баҕалаах дьоҥҥо барыларыгар аһаҕас.

Саха сирин мас-рестлинг федерациятын бэрэсидьиэнэ 2026 сыллаахха тэрилтэ 30 сыллаах үбүлүөйүгэр былааннарын туһунан кэпсээтэ. Ол курдук, олунньуга Дьокуускайга үбүлүөйгэ анаммыт өрөспүүбүлүкэтээҕи күрэхтэһии ыытыллара былааннанар. Ону таһынан, араас континеннартан күрэсчиттэр кыттыылаах бөдөҥ норуоттар икки ардыларынааҕы бырайыак концепцията билиһиннэрилиннэ. Айсен Николаев этиллибит көҕүлээһини өйөөтө.

Итини таһынан сырыы кэмигэр 2014 сыллаахха аһыллыбыт «Давидофф» сылгы пиэрмэтин үлэтин дьүүллэстилэр. Анатолий Баишев хаһаайыстыбатыгар 200-чэ сылгы уонна 50-ча ынах сүөһү баар. Тэрилтэ «Сылгыһыт күрэһэ» сылгыһыттар өрөспүүбүлүкэтээҕи күрэхтэригэр үстэ кыайбыта.

Саха успуордун устуоруйатыгар 2025 сыллааҕы Дыгын оонньууларын кыайыылааҕынан уонна Манчаары оонньууларын абсолютнай чөмпүйүөнүнэн киирбит Борис Сдвижков  ыччат спортивнай оскуолатыгар тириэньэрдиирин туһунан кэпсээтэ уонна Амма улууһугар оҕо успуордун сайыннарыыга былааннарын үллэһиннэ. Кини быйыл Ф. Лобанов аатынан Чапчылҕан орто оскуолатын баазатыгар сайыҥҥы лааҕыры арыйар санаалаах. Сыала — оҕолорго успуорка, култуураҕа уонна үгэс буолбут олох дьаһаҕар тапталы иҥэрии, онон тэҥэ, кинилэр киһи быһыытынан бары өттүнэн сайдалларыгар көмөлөһүү.