Ил Дархан Айсен Николаев Ис дьыала уорганнарын үлэһитин күнүнэн эҕэрдэлиир

Ытыктабыллаах Ис дьыала уорганнарын үлэһиттэрэ уонна бэтэрээннэрэ!

Саха Өрөспүүбүлүкэтин салалтатын аатыттан уонна тус бэйэм ааппыттан эһигини идэлээх бырааһынньыккытынан – Ис дьыала уорганнарын үлэһитин күнүнэн ис сүрэхпиттэн эҕэрдэлиибин! Бүгүн күн ахсын быраабы араҥаччылыыр, гражданнар бырааптарын көмүскүүр уонна буруйу оҥорууну утары охсуһар дьон идэлээх бырааһынньыктарын бэлиэтииллэр.

Эһиги үлэҕит – Саха сирин олохтоохторун куттала суох, уоскулаҥнаах олоҕун мэктиэтэ. Биэс сыл устата эһиги үрдүк таһымнаах үлэҕит, бэйэни харыстаммакка сулууспалыыргыт түмүгэр Саха сирэ Уһук Илиҥҥи федеральнай уокурукка буруйу оҥоруу, ол иһигэр ыар уонна ордук ыар буруйу оҥоруу көдөрүүлэринэн саамай намыһах таһымнаах эрэгийиэнинэн буолар. Быйыл тоҕус ыйын түмүгүнэн, өрөспүүбүлүкэ уопсастыбаннай сирдэргэ оҥоһуллубут буруйу оҥоруу аҕыйаҕынан дойду 10 бастыҥ эрэгийиэнин кэккэтигэр киирдэ.

Сыыппара технологиятын үйэтигэр кибер-буруйу оҥорууну уонна түөкүттэр утары киэҥ хабааннаах үлэни ыытаҕыт. Саха Өрөспүүбүлүкэтэ IT-эйгэҕэ арыллыбыт буруйдар ахсааннарын үрдээһинин тэтиминэн дойдуга тохсус миэстэҕэ таҕыста. Өрөспүүбүлүкэ судаарыстыбаннай бырагырааматын өйөбүлүнэн, ИДьМ сибээс оператордарын (ПАО «Мегафон» уонна ПАО «МТС») кытта информационнай-коммуникационнай технологиялары туһанан оҥоһуллар түөкүттэр тустарынан нэһилиэнньэҕэ СМС-биллэриини тэрийдэ. Биһиги эһиги уустук үлэҕитин толороргутугар мэлдьи өйөбүл буолабыт. 2023 сылтан Саха Өрөспүүбүлүкэтин ИДьМ патрульнай-постовой сулууспатын, учаастактааҕы боломуочунайдарын, саастарын ситэ илик оҕолор дьыалаларыгар иниспиэктэрдэрин уонна суол-патрульнай сулууспатын үлэһиттэригэр сыл аайы биир кэмнээх социальнай төлөбүр оҥоһуллар. ИДьМ подразделениеларын материальнай-техническэй хааччыйыыга, бырайыактары бэлэмнээһиҥҥэ, административнай дьиэлэри, сулууспа хосторун, идэҕэ бэлэмниир эбийиэктэри тутууга бииргэ үлэ ыытыллар. Бүгүҥҥү ыҥырыылар уонна кутталлар усулуобуйаларыгар эһиги хорсун быһыыгытын, идэҕитигэр бэриниигитин биһиги үрдүктүк сыаналыыбыт. Эһигиттэн үгүскүт Ийэ дойду интэриэһин  байыаннай дьайыы кэмигэр бэйэни харыстаммакка көмүскүүгүт, иэскитигэр уонна бирисээгэҕитигэр бэриниилээххитин көрдөрөҕүт. Эдэр үлэһиттэргэ сыаната суох уопуттарын, сулууспалыырга үтүө үгэстэри биэрэр бэтэрээннэрбитигэр ураты махталбын тиэрдэбин. Ис дьыала уорганнарын үлэһиттэригэр эрэллээх сулууспаҕыт, идэҕитигэр бэриниигит иһин махтанабын. Олоххут чугас дьоҥҥут өйөбүлүнэн туоллун, оттон үлэҕит дуоһуйууну эрэ аҕаллын. Төрөөбүт Сахабыт сирин уонна Бүтүн Арассыыйа туһугар сулууспаҕытыгар ситиһиилэри баҕарабын!

Саха Өрөспүүбүлүкэтин Ил Дархана Айсен Николаев