Бүгүн, сэтинньи 23 күнүгэр, Арассыыйаҕа Ийэлэр күннэрин көрсө, Саха сирин элбэх оҕолоох ийэлэригэр судаарыстыбаннай наҕараадалары туттардылар.
Ийэлэри чиэстиир бырааһынньыкка кэлбит ыалдьыттары уонна кыттааччылары В.А.Босиков аатынан Муусука Үрдүкү оскуолатын мусукаалынай ансаамбыла бырааһынньыктааҕы нүөмэринэн көрүстэ. Дьокуускайдааҕы кадет оскуолатын иитиллээччилэрэ ийэлэргэ сибэкки дьөрбөтүн туттардылар.
Ил Дархан Айсен Николаев сэтинньи 24 күнүгэр Арассыыйаҕа Ийэ күнүнэн сибээстээн, бүгүн элбэх оҕолоох ийэлэргэ уонна өрөспүүбүлүкэ социальнай-экэнэмиичэскэй сайдыытыгар кылааттарын киллэрбит ийэлэргэ судаарыстыбаннай наҕараадалары туттарда уонна махталын биллэрдэ.
«Ийэ буолуу – улуу чиэс уонна улахан, ыарахан үлэ. Ол иһин ийэҕэ саамай үрдүк таһымнаах көмө оҥоһуллуохтаах. Биһиги өрөспүүбүлүкэбит дьиэ кэргэн бэлиитикэтигэр үтүө холобурунан буолар”, — диэтэ Айсен Николаев.
Билигин өрөспүүбүлүкэ кэрэ аҥаардара дойдуну көмүскээччилэргэ уонна кинилэр дьиэ кэргэттэригэр көмөлөһөллөр, байыаннай дьайыыга гуманитарнай көмөнү оҥорууну тэрийэллэр.
Айсен Николаев Ийэҕэ үрдүк махтал бэлиэтин педагогическай үлэ бэтэрээнигэр, РФ уопсай үөрэхтээһинин бочуоттаах үлэһитигэр Феодосия Колесоваҕа (Чурапчы) туттарда. “Дьоруой Ийэ” бэлиэтинэн элбэх оҕолоох ийэлэр: Любовь Иванова (Дьокуускай, 11 оҕолоох), Анастасия Рудых (Анаабыр улууһуна Сааскылаах с. 10 оҕолоох), Чынара Тешебаева (Дьокуускай, 10 оҕолоох) наҕараадаланнылар.
“Ийэҕэ албан аат” II истиэпэннээх уордьанынан Үөһээ Бүлүү улууһун Харыйалаах сэлиэнньэтиттэн 8 оҕолоох Антонина Константинова наҕараадаланна. “Ийэҕэ албан аат” II истиэпэннээх уордьанынан 7 оҕону төрөппүт уонна ииппит Валентина Ераскумова (Сунтаар улууһун Туойдаах с.), Сахая Илюхина (Горнай улууһун Орто Сурт с.), Нина Нестерова (Орто Халыма Березовка с.), Надежда Прудецкая (Горнай улууһун Бэрдьигэстээх с.), Туйаара Федорова (Уус Алдан улууһун Чараҥ с.), Ольга Яковлева (Сунтаар улууһун Сунтаар с.) бэлиэтэннилэр.
Ону таһынан Софья Сидорова аатынан бочуоттаах бэлиэлэри уонна Саха Өрөспүүбүлүкэтин Махтал суругун туттардылар.
Бэйэлэрин эҕэрдэ тылларын Саха сирин дьиэ кэргэттэрин сойууһун бэрэссэдээтэлэ Жанна Валентиновна Грекова, “Ийэҕэ үрдүк махтал” бэлиэнэн наҕараадаламмыт Феодосия Гаврильевна Колесова эттилэр.
Ийэ бырааһынньыгын кыттыылаахтарын СӨ Судаарыстыбаннай филармониятын солиһа Леонид Анциферов “Мамины глаза” ырыатынан эҕэрдэлээтэ.
Гражданскай оборуона дьыалаларыгар уонна нэһилиэнньэ олоҕор куттала суох буолуутун хааччыйыы миниистирин собуйааччы Яна Наумова киэһээҥҥи…
Күннээҕи олоҕу кытта тэҥҥэ хардыылыыр дьон түөкүттэр бааллар эбит. Аны оскуоланы бүтэрээри сылдьар оҕолорго үрдүк…
Ырыа күнүгэр аналлаах кэнсиэртэр оптуорунньукка, ыам ыйын 21 күнүгэр, Саха сирин бары куораттарыгар уонна сэлиэнньэлэригэр…
СӨ Ил Дархана Айсен Николаев Нам улууһугар оробуочай сырыытын чэрчитинэн, Хатырык олохтоохторун кытары көрсүһүү тэрийэн…
Өлүөхүмэ, Нам улуустарыгар халаан уутун содулун көрөн, киһи долгуйар, хараастар. Онон дьон-сэргэ уталыппакка эмсэҕэлээбиттэргэ бэйэтин…
Бу туһунан Саха сирин бырабыыталыстыбатын Бэрэссэдээтэлин солбуйааччы Анатолий Семенов иһитиннэрдэ. Нам улууһугар халаан уутуттан үөрэх…