“Ил Дарханныын кэпсэтии” биэрии саҥа таһаарыыта “Саха” НКИК көстүөҕэ

Бүгүн, бэс ыйын 19 күнүгэр, “Ил Дарханныын кэпсэтии” биэрии саҥа таһаарыыта “Саха” НКИК уонна “Тэтим” араадьыйаҕа тахсыаҕа. Биэрии киэһэ 21:00 чаастан саҕаланыаҕа.

Ил Дархан Айсен Николаев РФ Бэрэсидьиэнэ Владимир Путин Саха сиригэр оруобуна биир сыл анараа өттүгэр кэлэ сылдьан биэрбит сорудахтарынан туох үлэ бара турарын туһунан кэпсиэҕэ.

Ону таһынан тыа сиригэр бөдөҥ эбийиэктэр – Горнай улууһун Бэс Күөл сэлиэнньэтигэр элбэх хайысхалаах киин уонна Мэҥэ Хаҥалас улууһун Аллараа Бэстээх бөһүөлэгэр Култуураны сайыннарар киин үлэҕэ киирбиттэригэр болҕомтотун ууруоҕа.

“Саха сирэ – Дьоруойдар сирдэрэ” кадровай бырагыраама олоххо киириитигэр, байыаннай дьайыы кыттыылаахтарын үлэҕэ ылыыга, реабилитацияны, социальнай адаптацияны баралларыгар кэлим сыһыан наадатын таарыйыаҕа.

Баһаартан сэрэхтээх кэм буола турарынан эрэгийиэҥҥэ ойуур баһаардарын умуруорар үлэ зондировщик-сөмөлүөтү көмөлөһүннэрэн хайдах бара турарын туһунан эмиэ кэпсэтиэхтэрэ.

Болҕомто киинигэр сүөһү аһын бэлэмниир хампаанньа, тутуу, массыына суолларын оҥоруу, сылытар сезоҥҥа бэлэмнэнии, ыраах баар сирдэргэ оттугу, таһаҕаһы тиэйии боппуруостара көрүллүөхтэрэ.

Ону таһынан телебиэриигэ Өрөспүүбүлүкэ Ыһыахтарын, “Манчаары оонньуулара” ХХII Спартакиада таарыллан ааһыахтара, диэн иһитиннэрэр Ил Дархан, бырабыыталыстыба пресс-сулууспата.