Ил Түмэн дьокутаата Елена Голомарева Өлөөн сэлиэнньэтин олохтоохторун кытта көрүстэ

Бүгүн Өлөөн сэлиэнньэтин олохтоохторун кытта норуодунай дьокутаат Елена Голомарева көрүстэ. Ыытар үлэтин туһунан кэпсээтэ. Кини улуус тэтимнээхтик сайдарын, атаҕар бигэтик турарын туһунан эттэ. Үс ыҥырыы устата олохтоохтор кыһалҕаларын быһаарыыга үлэлэспитин туһунан кэпсээтэ.

Маны тэҥэ нэһилиэнньэни патриотическай иитиигэ үлэлэһэн, Кыайыы дьыктаанын ыыталлара үгэскэ кубулуйбут.

— Учууталлар, балыыһалар оптимизацияҕа бараары гыммыттарыгар Арктика кэмитиэтэ тохтоппута. Дьон үлэлээх буоларын көрөртөн ордук суох, — диэтэ Елена Христофоровна.

Дьиэни тутууга албыннаппыт дьон кыһалҕатын быһаарыыга эмиэ боппуруоһу күүскэ туруорбутун Айталина Винокурова холобурдаата. Өссө эбэн эттэххэ, Дьэлиҥдэ МУП салайааччыта вездеходу ылбыттарын кэннэ, навигация суола сабыллаары турдаҕына тута төлөпүөн үрдүгэр түһэн көмөлөспүтүн иһин Елена Христофоровнаҕа махтаммыта. Онон өлөөннөр норуодунай дьокутааттарын үлэтин биһирииллэр, киэн тутталлар.

«Буолаары турар быыбарга ситиһиини баҕарабын», — диэтэ успуорт бэтэрээнэ Николай Семенович Семенов.

Олохтоохтор дьокутааттарыгар дивидент боппуруоһун туруордулар.

Хаартыска: ааптар.