Хаартыска: Ил Түмэн
Көрсүһүү муус устар 7 күнүгэр Дьокуускай куоракка Нам улууһун күннэрин чэрчитинэн ыытылынна.
Тэрээһини Ил Түмэн Бэрэссэдээтэлэ Алексей Еремеев иилээн-саҕалаан ыытта.
Ил Түмэн олохтоох бэйэни салайыныыга сис кэмитиэтин бэрэссэдээтэлэ Владимир Прокопьев «Публичнай былаас биир уопсай тиһигэр олохтоох салайыныыны тэрийии уопсай бириинсиптэрин туһунан» федеральнай сокуон ымпыгын-чымпыгын билиһиннэрдэ уонна ыалдьыттар боппуруостарыгар хоруйдаата.
Кэмитиэт бэрэссэдээтэлэ сүрүн болҕомтотун боломуочуйа боппуруоһугар уурда. Ол курдук, кини иһитиннэрбитинэн, сокуоҥҥа ыйыллыбытах боломуочуйалары олохтоох бэйэни салайыныы уорганнарыттан ханнык да надзорнай уорган ирдиэ суохтаах.
«Сокуон быйыл бэс ыйын 19-гар күүһүгэр киирэр. Оттон 2027 сыл тохсунньу 1 күнүттэн букатыннык киириэхтээх. Ол иһин өрөспүүбүлүкэ сокуонун быйылгы сыл бүтүөр диэри бүтэриэхтээхпит», – диэтэ Владимир Прокопьев.
Улуус бэрэстэбиитэллэрэ систиэмэ биир дуу, икки дуу таһымнаах буоларын, баһылыктар үлэлиир болдьохторун, боломуочуйаларын, талыллар ньымаларын туһунан ыйытыылары дакылаатчыттан ыйыттылар.
Алексей Еремеев өрөспүүбүлүкэ былааһа икки таһымнаах тиһик хааларыгар көрүүлээх диэн эттэ. «Ил Дархан Айсен Николаевы кытта кэпсэтэн баран икки мэндиэмэннээх олохтоох бэйэни салайыныы өрөспүүбүлүкэҕэ хаалыан наада диэн түмүккэ кэлэн олоробут. Онон бу сокуоммутун ылыныахтаахпыт, инньэ гынан, кэлэр дьылга биһиги саҥа сокуоннаах киириэхттээхпит», – диэн эттэ Ил Түмэн спикэрэ.
Улуус бас-көс ситэриилээх былаас бэрэстэбиитэллэригэр бэйэлэрин кыһалҕаларын кэпсээтилэр уонна сытыытык турар ыйытыылары биэрдилэр. СӨ тыа хаһаайыстыбатын уонна ас-үөл бэлиитикэтин миниистирэ Артем Александров, СӨ үп миниистирин эбээһинэһин толорооччута Иван Алексеев, СӨ оборона дьыалаларыгар уонна нэһилиэнньэ олоҕор куттал суох буолуутун хааччыйыыга миниистирин бастакы солбуйааччыта Айаал Вензель баһылыктар ыйытыыларыгар эппиэттэри биэрдилэр.
Кэпсэтиигэ хаарбах туруктаах дьиэттэн көһөрүү бырагырааманан дьиэлэри тутууну үбүлээһин, муниципальнай сулууспалаахтар биэнсийэлэрэ, инбэлиит оҕолоох ыаллары дьиэнэн хааччыйыы, үүтү туттарыы сыаната уо.д.а. боппуруостар таарылыннылар.
Нам улууһун баһылыга Юрий Слепцов Алексей Еремеевкэ былырыыҥҥы халаан содулун туоратарга көмөтүн иһин махтанна. 2024 сыллааҕы ыарахан түбэлтэ улууска быйыл хатыламматыгар билиҥҥиттэн күүстээх үлэ ыытылларын эттэ.
Түмүккэ, Ил Түмэн Бэрэссэдээтэлэ Алексей Еремеев халаан уутугар бэлэмнэнэн, үчүгэйдик оттоон, кыстык үлэтигэр бэлэмнэнэн эһиилги дьылга олох хаамыытынан кэлэн иһэргэ ыҥырда.
Ону таһынан, Россия Бэрэсидьиэнэ «Дьокуускай куорат төрүттэммитэ 200 сылын бырааһынньыктааһын туһунан» Ыйаах баттаабытын этэн туран, Дьокуускай куорат маҥнайгы түһүүтэ Нам улууһугар түһэриллибитин ордук суолталаан бэлиэтээтэ.
Ахсынньы 13-15 күннэригэр Москва куоракка «Твой Ход – 2025» Бүтүн Арассыыйатааҕы устудьуоннар пуорумнара ыытылларынан, «Сыл…
Дьокуускайга административнай дьиэҕэ тахсыбыт киһи өлүүлээх баһаар холуобунай дьыалатыгар бириигэбэри таһаардылар. Бу туһунан ахсынньы 16…
Бүгүн, ахсынньы 16 күнүгэр, Дьокуускайга Российскай Федерация бочуоттаах полярнигын Николай Находкин «Санников сиригэр эспэдииссийэ» диэн…
Өрөспүүбүлүкэ агробырамыысыланнай комплексын 2025 сыллааҕы үлэтин түмүктүүр мунньаҕар бастыҥ муниципальнай оройуоннар бэлиэтэннилэр. Бу туһунан СӨ…
Тымныыттан эчэйии үксэ арыгы иһииттэн тахсар диэн Өрөспүүбүлүкэтээҕи 2 №-дээх балыыһатын - Суһал мэдиссиинэ көмөтүн…
Тэрээһиннэргэ байыаннай дьайыы бэтэрээннэрэ уонна кыргыһыы хонуутугар охтубут дьон дьиэ кэргэттэрин чилиэннэрэ, барыта 28 тыһыынчаттан…