Ил Түмэн дьокутааттара Судаарыстыбаннай Дуума дьокутааттарын кытары көрүстүлэр

Өрөспүүбүлүкэ норуодунай дьокутааттара, Ил Түмэн сис кэмитиэттэрин уонна хамыыһыйаларын бэрэссэдээтэллэрэ РФ Судаарыстыбаннай Дууматын Тутулуга суох судаарыстыбалар дьыалаларыгар, евразийскай интеграцияҕа уонна биир дойдулаахтары кытары сибээстэһиигэ кэмитиэтин бэрэссэдээтэлэ Леонид Калашниковы уонна РФ Судаарыстыбаннай Дууматын энэргиэтикэҕэ сис кэмитиэтин бэрэссэдээтэлин бастакы солбуйааччы Сергей Левченконы кытары көрүстүлэр.

Леонид Калашников бэлиэтээбитинэн, урут эрэгийиэннэр сокуону таһаарар уорганнарыгар Судаарыстыбаннай Дуума үлэтин-хамнаһын туһунан кэпсэтии, дьокутааттар ыйытыыларын уонна этиилэри, буолаары буолан, Саха сирэ курдук саамай улахан субъегын дьокутааттарын истии суоҕа.

«Биһиги кэмитиэппит көдьүүстээх үлэтэ икки өттүттэн судаарыстыбаннай сыһыаннаһыыны хайдах тутарбытыттан тутулуктаах», — диэтэ Леонид Калашников.

Саха Өрөспүүбүлүкэтин дьокутааттарын кытары көрсүһүү кэмигэр кини РФ Бырабыыталыстыбатын Бэрэссэдээтэлэ Михаил Мишустины кытары көрсүһүү түмүгүн, бу сыл кулун тутарыгар бастакы ааҕыыга ылыныллыбыт хотугу сиргэ таһаҕаһы таһыы туһунан федеральнай сокуон бырайыагын, электроэнергияҕа тарыыптары, дьиэ субсидияларын, дьиэ сэртипикээттэрин туһунан кэпсээтэ.

«Бу боппуруостар бары Уһук Илин олохтоохторун кытары быһаччы сибээстээхтэр уонна долгуталлар. Ол гынан баран, олох-дьаһах субсидиятыгар федеральнай бүддьүөттэн киирэр үп суумата – 4 млрд солк. уонна 1300 сэртипикээт, олус кыра. Биһиги саныырбытынан, бу суума хас эмэ төгүл улаатыахтаах», — диэн дьокутаат Леонид Калашников эттэ.

РФ Судаарыстыбаннай Дууматын энэргиэтикэҕэ сис кэмитиэтин бэрэссэдээтэлин бастакы солбуйааччы Сергей Левченко электроэнергияҕа тарыыбы тэҥнээһин туһунан кыһалҕа боппуруоһун туруорда. «Биир нэһилиэккэ атын тарыып, ыаллыы сытар нэһилиэккэ туспа тарыып ирдэнэрэ сыыһа. Бу нэһилиэнньэҕэ эрэ буолбакка, оҥорон таһаарыыга олус улахан суолталаах боппуруос быһаарыллыан наада», — диэн кини бэлиэтээтэ.

Кини Булуҥ улууһугар тыал установкатынан уонна Үөһээ Дьааҥыга баар күн сардаҥатынан үлэлиир ыстаансыйа курдук солбук энэргиэтикэни биэрэр уопуту хоточчу туһанарга эттэ.

Мунньах түмүгэр Ил Түмэн бэрэссэдээтэлэ Алексей Еремеев Судаарыстыбаннай Дуума дьокутааттарыгар өрөспүүбүлүкэ дьокутааттарын, ситэриилээх былаас уорганнарын, уопсастыбаннай тэрилтэлэр бэрэстэбиитэллэрин кытары кэлэн көрсүбүттэригэр уонна кыһалҕалаах боппуруоска эппиэттээбиттэригэр махтанарын эттэ.

Ил Түмэн пресс-сулууспата