Ил Түмэн дьокутаата Гаврил Алексеев быыбардааччыларын кытта өрүү бииргэ

Ааһан эрэр 2025 сыл Өймөкөөн улууһун олохтоохторугар айылҕа иэдээнэ — алдьатыылаах халаан үгүс хоромньуну оҥорон, олохтоохтор улахан тургутууну аастылар.

Маныаха Халыма-Индигиир уокуругуттан Ил Түмэн дьокутаата Гаврил Алексеев социальнай суолталаах бырайыактары олоххо киллэриигэ улахан өйөбүлү оҥорбутун бэлиэтиир тоҕоостоох.  Ил Түмэн салалтатын сорудаҕынан Гаврил Алексеев кэллиэгэтэ, норуот дьокутаата Евгений Слепцовы кытта дьокутааттартан  харчы хомуйан,  27 дьокутаат өйөбүл илиитин ууммута.   507 000 солкуобай хомуллубутуттан  192 000 солкуобай Өймөкөөн оройуонун олохтоохторугар аадырыстаммыт көмөҕө бэриллибитэ. Гаврил Николаевич көҕүлээһининэн парламент чилиэннэрэ салайар тэрилтэлэриттэн  Өймөкөөн улууһун социальнай-экономическай сайдыытын көмө пуондатыгар 2 365 255 солкуобай хомуллубута.  Бу үп барыта чөлүгэр түһэрии үлэтигэр уонна эмсэҕэлээбиттэргэ эбии үп-харчы көмөтүгэр туһаныллыбыта.

Сыл устата норуот дьокутаатын быһыытынан Гаврил Алексеев 56 Өймөкөөн улууһун олохтоохторуттан киирбит сайабылыанньалары көрдө-иһиттэ уонна олорго туһааннаах быһаарыыны ылынна. Ол курдук, быһаарыллыбыт сүрүн боппуруостартан сороҕун холобурдаатахха: Томтор нэһилиэгин Рабочай түөлбэтигэр  «Теплоэнергосервис» АУо саҥа хочуолунайыттан олохтоохтору сылаас уунан хааччыйыы боппуруоһа быһаарылынна. Төрүт нэһилиэгин тыыл бэтэрээнэ Ульяна Слепцова олорор дьиэтигэр саҥа пластик түннүгү олорпуттара. Үчүгэй нэһилиэгиттэн байыаннай дьайыы кыттыылааҕын огдообото уонна элбэх оҕолоох ыал ийэтэ А.Д. Павлова биирдиилээн дьиэ тутуутугар тутуу матырыйаалын ылыыга уонна тиэрдиигэ үп-харчы көмөтүн ылла. Үгэс быһыытынан, «Тымныы полюһа» кыһыҥҥы экстремальнай марафону тэрийиигэ үбүнэн өйөбүл оҥоһулунна. 2025 сылга 42,2 км дистанцияҕа бастыҥ спортсменнар харчынан бириэмийэҕэ персонализированнай сэртипикээттэринэн бэлиэтэммиттэрэ.  Үчүгэй нэһилиэгин дьаһалтатын көрдөһүүтүнэн үгэс буолбут табаһыттар күрэхтэһиилэрин ыытыыга бензин генераторынан хааччыйбыта.

Ити курдук,   олохторугар-дьаһахтарыгар көстөр кыһалҕалары туоратыыга, кэскиллээх сонун сүүрээннэри өйүүргэ туһуламмыт үлэни өрүү ыыта олороругар Тымныы полюһун Өймөкөөн улууһун олохтоохторо Ил Түмэн дьокутаата Гаврил Алексеевка барҕа махталларын тиэрдэллэр.