Ил Түмэн өрөспүүбүлүкэ бүддьүөтүн бырайыагын иккис ааҕыыга көрүөҕэ

Саха Өрөспүүбүлүкэтин Судаарыстыбаннай Мунньаҕын (Ил Түмэн) пленарнай мунньаҕар норуот дьокутааттара «2026 сылга уонна 2027-2028 сыллардааҕы былааннаммыт кэмҥэ өрөспүүбүлүкэ бүддьүөтүн туһунан» сокуон бырайыагын иккис ааҕыыга көрүөхтэрэ.

Бу дьүүллэһии өрөспүүбүлүкэ сүрүн докумуонун оҥорууга быһаарыылаах түһүмэҕинэн буолуоҕа. Бу туһунан www.sakha.gov.ru саайт иһитиннэрэр.

Парламентарийдар уонна бырабыыталыстыба чилиэннэрин этиилэринэн, 2026 сыллааҕы бүддьүөт кэнники сыллартан саамай уустуктардааҕынан буоларын үрдүнэн,  социальнай хайысхатын сүтэрбэт. Бүддьүөт бары ороскуотун 48-49% диэри чааһа социальнай эйгэҕэ — доруобуйа харыстабылыгар, үөрэхтээһиҥҥэ, социальнай көмүскэлгэ туһаайыллар. Парламент сис кэмитиэттэрэ өрөспүүбүлүкэ бырабыыталыстыбатын кытта бүддьүөтү оҥорууга көхтөөхтүк үлэлээтилэр. Бу кэм иһигэр 700 көннөрүү, ону тэҥэ Айсен Николаев тус кыттыытынан РФ Үпкэ министиэристибэтин кытта бииргэ үлэлэһии түмүгэр федеральнай бүддьүөттэн эбии киирбит 28 млрд солк. тыырыы боппуруостарын дьүүллэстилэр.

Ааспыт бэнидиэнньиккэ өрөспүүбүлүкэ баһылыга Ил Түмэн салайааччыларын кытта иккис ааҕыыга бэлэмнэниигэ анаммыт үлэ мунньаҕын ыыппыта. Кини сүрүн үп докумуона олус уустук усулуобуйаҕа ылылларын бэлиэтээбитэ уонна оҥоһуллубут үлэ иһин дьокутааттар куорпустарыгар, парламент кэмитиэттэригэр махтаммыта. Онуоха Юрий Николаев салайааччылаах Бүддьүөккэ, үпкэ, нолуокка уонна сыана бэлиитикэтигэр, бас билии уонна приватизация боппуруостарыгар сис кэмитиэт ураты кылаатын  эттэ. Ил Түмэн бүддьүөккэ кэмитиэтин бэрэссэдээтэлэ билиҥҥи туругунан бары наадалаах ороскуоттары сабар кыах ситиһиллэ илигин, онон дьүүллэһии пленарнай мунньахха салҕаныаҕын иһитиннэрбитэ. Көннөрүүлэр сорохторо толору, сорохторо – быстахтык өйөннүлэр. Сорох ороскуоттары чопчулуур үлэ инникитин күүтэр, ол үлэ 2026 сыл устата салҕанан барыаҕа.