Ил Түмэн пленарнай мунньаҕын бэбиэскэтинэн 50 боппуруос көрүллүөҕэ

Алтынньы 22-23 күннэригэр былааннаммыт тохсус уочараттаах Ил Түмэн пленарнай мунньаҕар 50 боппуруос көрүллүөҕэ.

Пленарнай мунньах бүгүн, алтынньы 22 күнүгэр, сарсыарда 10:00 чаастан саҕаланар. Норуот дьокутааттара бастакынан каадыры анааһын туһунан боппуруостары көрүөхтэрэ. Парламентарийдар норуот дьокутаата Евгений Слепцов боломуочуйатын бигэргэтэр туһунан Ил Түмэн уурааҕынан бигэргэтиэхтэрэ, Бүлүү улууһун 11 №-дээх, Горнай улууһун 12 №-дээх, Эдьигээн улууһун 13 №-дээх, Ленскай улууһун 16 №- дээх, Муома улууһун 20 №-дээх уонна Өлүөхүмэ улууһун 25 №-дээх суут учаастактарын судьуйаларын дуоһунастарыгар талыахтара. Саха сирин парламенын  IX уочараттаах пленарнай мунньаҕар өрөспүүбүлүкэ бүддьүөтүн, тарыып бэлиитикэтин олохтооһунун кытта сибээстээх сокуон барылларын көрүөхтэрэ. Ону кытта 2025 сылга уонна 2026-2027 сылларга былааннаах кэмҥэ СӨ булгуччулаах мэдиссиинискэй страховкалааһын территориальнай пуондатын сүрүн көрдөрүүлэрин дьүүллэһиэхтэрэ. Бу туһунан Ил Түмэн пресс-сулууспата иһитиннэрэр.

Пленарнай мунньах бэбиэскэтин  бу сигэнэн https://iltumen.ru/sessions/plenary/80 билсиэххэ сөп. Ону кытта быһа эпиир ыытыллыаҕа —https://plvideo.ru/watch?v=cN0cuEIPKopT