Ил Түмэн VII ыҥырыытын бастакы пленарнай мунньаҕа балаҕан ыйын 25-26 күннэригэр ыытыллыа

Саҥа талыллыбыт норуот дьокутааттара кэлэр нэдиэлэ саҥатыттан бастакы мунньахтара саҕаланыа.

Ол туһунан тустаах ыйаахха бу күннэргэ Ил Дархан Айсен Николаев илии баттаата диэн Ил Түмэн пресс-сулууспата иһитиннэрэр.

Ыйаах СӨ Киин быыбардыыр хамыыһыйатын балаҕан ыйын 14 күнүнээҕи 43/1-7 №-дээх Саха Өрөспүүбүлүкэтин сэттис ыҥырыылаах норуот дьокутааттарын талыы уопсай түмүктэрин олохтооһун туһунан уурааҕар олоҕуран уонна СӨ Төрүт сокуонун 61, 68, 73 ыстатыйаларынан салайтаран баттанна.

Судаарыстыбаннай Мунньах сэттис ыҥырыытын бастакы пленарнай мунньаҕа балаҕан ыйын 25-26 күннэригэр 10:00 ч. Ил Түмэн дьиэтигэр ыытыллыа.