Ил Түмэҥҥэ байыаннай дьайыылар кыттыылаахтарын дьиэ кэргэттэрин өйөбүлүн туһунан дьүүлэстилэр

Ил Түмэн Судаарыстыбаннай Мунньаҕын Бэрэссэдээтэлин солбуйааччы Антонина Григорьева байыаннай дьайыылар кыттыылаахтарын дьиэ кэргэттэрин өйүүр туһунан боппуруоһунан уопсастыбаннай тэрилтэлэр бэрэстэбиитэллэрин кытары көрүстэ.

Мунньахха өрөспүүбүлүкэ норуотун дьокутааттара – Бүтүн Арассыыйатааҕы Норуот фронун эрэгийиэннээҕи исполкомун салайааччыта Валерий Лютай, Дьокуускай куорат  Киин уокуругун Попечителлэрин сэбиэтин салайааччыта Татьяна Егорова, Норуот фронун эрэгийиэннээҕи ыстаабын бэрэссэдээтэлэ Дмитрий Паньков кыттыыны ыллылар.

Итини таһынан Губинскай уокурук мобилизацияламмыт дьон дьиэ кэргэттэрин кытары үлэҕэ Попечителлэрин сэбиэтин бэрэстэбиитэллэрэ: управа салайааччыта Гулжан Огонёрова, Дьокуускайдааҕы дуума дьокутаата Владислав Дмитриев, «Саха» НКИХ генральнай дириэктэрэ Олег Марков, «Мир Слуха» ААУо дириэктэрэ Ольга Голдобина, о.д.а кытыннылар.

Мунньахха байыаннай дьайыылар кыттыылаахтарын дьиэ кэргэттэрин өйүүр үлэ Дьокуускай куорат баһылыгын Евгений Григорьев тус хонтуруолугар сылдьарын бэлиэтээтилэр. Оҥоһуллар үлэлэр тустарынан Арассыыйатааҕы Норуот фронун эрэгийиэннээҕи исполкомун салайааччыта Валерий Лютай уонна Норуот фронун эрэгийиэннээҕи ыстаабын бэрэссэдээтэлэ Дмитрий Паньков бэйэлэрин санааларын эттилэр.

«Бу хайысхаҕа бары үлэлииллэр, ол гынан баран чуолкай тутуллаах уонна ситимнээх үлэ суоҕун элбэх киһи кыһалҕатыттан көрөбүт», — диэн эттэ норуот дьокутаата Валерий Лютай. Кини этэринэн, Саха сиригэр байыаннай дьайыылар кыттыылаахтарын дьиэ кэргэттэрин социальнай өйөбүл дьаһаллара оҥоһуллубуттара, ол эрээри олоххо түргэнник киирэн испэттэр. Онтон сылтаан элбэх боппуруос бытааннык быһаарыллар. Ол иһин, кини өрөспүүбүлүкэ мобилизацияламмыт дьонун хас биирдии дьиэ кэргэнигэр социальнай пааспар уонна быраап өттүнэн сүбэ-ама биэрэр, туспа юридическай сулууспаны оҥоруохха диэн этии киллэрдэ.

Мунньахха судаарыстыбаннай былаас уорганнара, муниципальнай тэриллиилэр, уопсастыбаннай тэрилтэлэр уонна атын даҕаны биэдэмэстибэлэр бииргэ үлэлиир мэхэньиисимнэрин тупсарар туһунан дьүүллэстилэр, салгыы үлэлиир былааны көрдүлэр.

Түмүккэ, Антонина Григорьева ураты суолталаах боппуруоһу бэлиэтээн туран, байыаннай дьайыылар кыттыылаахтарын хас биирдии дьиэ кэргэнэ судаарыстыбаттан сөптөөх көмөнү ылыахтаах диэтэ уонна активистарга кыһамньылаах үлэлэрин иһин махтанна.