Ил Түмэҥҥэ Конституцияҕа уларытыылары киллэриигэ аһаҕас истиилэр буола тураллар

Алтынньы 10 күнүгэр, бээтинсэҕэ, парламеҥҥа буола турар аһаҕас истиилэргэ СӨ Конституциятын федеральнай нуормаларга сөп түбэһиннэриини дьүүллэһэллэр. Бу туһунан www.sakha.gov.ru иһитиннэрэр.

СӨ Конституционнай сокуонугар уларытыылары киллэрэр бырайыагы Ил Түмэн Судаарыстыбаннай тутулга уонна сокуону оҥорууга сис кэмитиэтин кэҥэтиллибит мунньаҕын быһыытынан көрөллөр. Истиилэргэ норуот дьокутааттара, Конституционнай хамыыһыйа уонна Сэбиэт чилиэннэрэ, министиэристибэлэр, биэдэмистибэлэр уонна Дьокуускай куораттааҕы Дума бэрэстэбиитэллэрэ кыттыыны ылаллар. Ону таһынан, дьүүллэһиигэ өрөспүүбүлүкэ Идэлээх сойуустарын федерациятын, өрөспүүбүлүкэ Уопсастыбаннай балаататын дэлэгээттэрэ, гражданскай активистар уонна СМИ бэрэстэбиитэллэрэ кыттыстылар.

Өрөспүүбүлүкэ төрүт сокуонугар уларытыылары уонна эбиилэри билиһиннэрбит СӨ Бырабыыталыстыбатын Бэрэссэдээтэлин солбуйааччы Ольга Балабкина  бэлиэтээбитинэн, көннөрүүлэри киллэрии сыала – Саха сирин Конституциятын федеральнай сокуоҥҥа сөп түбэһиннэрии буолар.

«Уларытыылар аһаҕас былаас биир кэлим тиһигэ олохтонорунан уонна олохтоох салайыныы уорганнара аһаҕас былаас биир кэлим тиһигэр киирэллэринэн сибээстээн, олохтоох салайыныы эйгэтигэр өрөспүүбүлүкэ Конституциятын үлэлиир нуормаларын чуолкайдыырга; үөрэхтээһин эйгэтигэр нуормалары сөп түбэһиннэриигэ; СӨ Ил Дарханын сорох боломуочуйаларын уонна РФ Бэрэсидьиэнинэн анаммыт СӨ Ил Дарханын эбээһинэһин быстах кэмҥэ толорооччу бырааптаах статуһун чуолкайдыырга туһуланаллар», – диэтэ СӨ Бырабыыталыстыбатын бэрэссэдээтэлин солбуйааччы Ольга Балабкина.

Ол курдук, Күндү металлар уонна күндү таастар судаарыстыбаннай пуондаларын салайыыга уонна уорганнар икки ардыларынааҕы үлэни тэрийиигэ боломуочуйалара кэҥииллэр. Олохтоох салайыныы эйгэтигэр сокуон федеральнайга сөп түбэһиннэриллэр, үлэлии турар икки таһымнаах модель уонна муниципалитеттар ураты бырааптара бигэргэтиллэр.

Аһаҕас истиилэр түмүктэринэн Конституционнай сокуон бырайыага өрөспүүбүлүкэ парламенын пленарнай мунньаҕар көрүллүөҕэ.