Ил Түмэҥҥэ Төрүт сокуоҥҥа уларытыылары киллэриигэ аһаҕас истиилэр түмүктэннэ

Ил Түмэҥҥэ  Саха Өрөспүүбүлүкэтин Төрүт Сокуонугар уларытыылары киллэриигэ анаммыт аһаҕас истиилэр түмүктэннилэр. Истиилэр Ил Түмэн Судаарыстыбаннай тутулга уонна сокуону оҥорууга сис кэмитиэтин кэҥэтиллибит мунньаҕын көрүҥүнэн ыытылыннылар. Аһаҕас истиилэргэ 30-ча кыттааччы тыл эттэ.

Бу былаһаакка уопсастыба араас араҥатын – бэлитиичэскэй бартыйалар, уопсастыбаннай тэрилтэлэр, Идэлээх сойуустар хамсааһыннарын, муниципальнай тэриллиилэр бэрэстэбиитэллэрин санааларын истэргэ кыаҕы биэрдэ. Өрөспүүбүлүкэ Төрүт сокуонугар көннөрүүлэри уонна уларытыылары киллэриини дьүүллэһии көхтөөхтүк барда.

Мунньах кэмигэр элбэх суругунан ыйытыы уонна этии киирдэ. Ил Түмэн дьокутааттара нэһилиэнньэ санаатын иһиттилэр. Төрүт сокуоҥҥа көннөрүүлэргэ сыһыаннаах эрэ буолбакка, тыа хаһаайыстыбатын, бырамыысыланнаһын, үөрэхтээһинин эйгэтигэр баар хас да кыһалҕа туһунан ыйытыылар киирдилэр.

Аһаҕас истиилэр түмүктэринэн Конституционнай сокуон бырайыага өрөспүүбүлүкэ парламенын пленарнай мунньаҕар көрүллүөҕэ.

Түмүктэри таһааран, СӨ Бырабыыталыстыбатын Бэрэссэдээтэлин солбуйааччы Ольга Балабкина киллэриллэр көннөрүүлэр бары уопсастыба сайдыытыгар уонна дьон олоҕун тупсарыыга туһуламмыттарын  бэлиэтээтэ:  «Биһиги өрөспүүбүлүкэбит социальнай судаарыстыбанан буолар,  инникитин да буолуоҕун билэбит. Онно үөрэхтээһиҥҥэ да, олохтоох салайыныы тиһигэр былаас быраабын тутуһууга даҕаны бары эбээһинэстэр мэктиэлэнэллэр. Бүгүн этиллибит дьаһаллар барыта дьон туһугар туһуланаллар — үөрэхтээһин тиһигэ салгыы сайдарын, ону тэҥэ дьон муниципальнай тэриллиилэр баһылыктарын таларга уонна анааһыҥҥа ордук көхтөөхтүк кытталларын туһугар».