Хаартыска: ааптар тиксэриилэрэ
Бу нэдиэлэҕэ, муус устар 21-30 күннэригэр «Симэх» арт-солуоҥҥа (Аржаков уул. 6) П.Н. уонна Н.Е.Самсоновтар ааттарынан Хатас орто оскуолатын нуучча тылын уонна литературатын үрдүк категориялаах учуутала, РФ үтүөлээх үлэһитэ, педагогическай наука хандьытаата, М.Е.Николаев аатынан пуонда лауреата, СӨ Суруйааччыларын сойууһун чилиэнэ Оксана Павловна Гаврильеваҕа- Айсанаҕа «Норуот уус-уран оҥоһуктарын маастара» сибидиэтэлистибэни туттардылар.
Оксана Гаврильева иис абылаҥар ылларан, утумнаахтык дьарыктанан, саха биллэр маастардарын үлэлэрин батыһа сылдьан көрөн-истэн кынаттанан, сыал-сорук туруорунан араас хайысхалаах быыстапкаларга кыттан, үгүс киһи сэҥээриитин ылан, устунан бэйэтин сатабылыгар иискэ баҕалаах дьоҥҥо сүбэ-ама буолан кэллэ. Кини оҕуруонан, түүлээҕинэн, сиэлтэн, кылтан, араас сыаналаах таҥаһынан уо.д.а. айылҕа матырыйаалларын сатабыллаахтык тып-тап тутан тикпит үлэлэрэ бүгүҥҥү быыстапкаҕа кэлбит дьон сүргэлэрин көтөхтө, үгүстэри сөхтөрдө. Оксана Гаврильева икки сыллааҕыта эмиэ манна, «Симэх» дьиэтигэр быыстапкалаабытын санаан кэллим. Оччолорго быысапка, баайыы, кыбытык тигии арааһа, ыһыахха кэтэр байбаралаах былааччыйалар, манна бүгүн көстүбэт оҕуруо саҕалар, суумкалар уо.д.а. көрдөрүүгэ баалларын сөҕө көрбүппүн санаан аһардым…
Бу быыстапка сулустаах чааһынан Оксана Павловна Гаврильеваҕа үөрүүлээх быһыыга-майгыга «Норуот уус-уран оҥоһуктарын маастара» диэн сибидиэтэлистибэни «Симэх» киин дириэктэрэ Яна Викторовна Игнатьева туттарыыта буолла. «Үктэл» иистэнньэҥнэр устуудьуйаларын салайааччыта Людмила Петровна Жиркова мустубут дьоҥҥо Оксана Гаврильева иискэ маҥнайгы хардыыларыттан саҕалаан, күн бүгүҥҥэ диэри хайдах-туох үлэлэри толорон кэлбитин туһунан сиһилии кэпсээн-ипсээн дьоһун иһитиннэриини оҥорон, сатабыллаахтык салайан ыытта.
«Тускул» сынньалаҥ киин дириэктэрэ Валентин Чепалов, куорат дууматын дьокутаата Алексей Осипов, Хатас орто оскуолатын дириэктэрэ Николай Слепцов, Оксана Павловна биир идэлээхтэрэ, үөрэнээччилэрэ, устудьуон сыллааҕы доҕотторо, үөлээннээхтэрэ, аймах-билэ дьоно эҕэрдэ тылы этэн, хас биирдиилэрэ дьоһун ахтыыны оҥордулар.
Иккис күнүгэр норуот уус-уран оҥоһуктарын маастара Оксана Павловна Гаврильева маастар-кылааһыгар кэлбит дьон иис кистэлэҥнэригэр ыйыы-кэрдии ыллыбыт. Ол быыһыгар өбүгэлэрбит сатабылларын туһунан дуоһуйа кэпсэттибит, айар дьон буоларбыт быһыытынан, хоһоон да ааҕан иһитиннэрдибит.
Ити курдук, муус устар 30 күнүгэр диэри Оксана Гаврильева быыстапкатын көрүөн баҕалаахтарга «Симэх» аана аһаҕас, ону сэргэ күнүс 14.00. чаастан маастар кылаастар буолуохтара.
Баһаалыста, кэлиҥ, дуоһуйа көрүҥ, иис абылаҥын кистэлэҥэр уһуйуллуҥ!
Августина ВЛАДИМИРОВА-ХАБАРОВА
Бу ураты каарта оҕолорго төрөөбүт дойдуларын дириҥник өйдүүргэ уонна умнуллубат өйдөбүллэри бэлэхтиэҕэ. Манна Саха сирин…
Соторутааҕыта Ыксаллаах быһыы-майгы министиэристибэтин 35 сылыгар аналлаах тэрээһин Уһук Илин бастыҥ баһаарынайдарын түмтэ. Бу туһунан…
От ыйын 3 күнүттэн 5 күнүгэр диэри Нерюнгрига өрөспүүбүлүкэтээҕи Олоҥхо ыһыаҕа ыытылларынан сибээстээн, арыгыны атыылааһыҥҥа…
От ыйын 4-8 күннэригэр Дьокуускайдааҕы VIII норуоттар икки ардыларынааҕы киинэ бэстибээлэ ыытыллыаҕа. Быйылгы бэстибээл сүрүн…
Бүгүн Мииринэй оройуонугар баар «Саха сирин тыыннаах алмаастара» пааркаҕа («Живые алмазы Якутии») пааркаттан үөрүүлээх сонун…
Өлүөхүмэҕэ саҥа оҕо поликлиникатын үөрүүлээхтик астылар. Урут поликлиника 1980-с сыллардааҕы дьиэҕэ баар эбит. Билигин тэрилтэҕэ…