«Илин эҥэр» маҕаһыын дьиэтэ туохтан умайбыта билиннэ

Бэҕэһээ, ыам ыйын 4 күнүгэр, Дьокуускайга «Илин эҥэр»  атыы-эргиэн киинэ баар  дьиэтигэр улахан баһаар буолан, элбэх киһини эвакуациялаабыттара.  

Дьокуускай куорат  дьаһалтатын пресс-сулууспата иһитиннэрбитинэн, маҕаһыын  хоруобуйатын (кровля)  оҥоро сылдьан, үлэҕэ  сэрэхтээх буолуу быраабылатын кэһии түмүгэр баһаар тахсыбыт. Баһаар тахсыбыт сириттэн гаас боллуоннара, битумнаах бааҥкалар, түргэнник умайан тахсар састааптаах тэриллэр ылыллыбыттар.

Баһаарга  19 кыбартыыра эмсэҕэлээбит.  Билиҥҥи туругунан олорор дьиэнэн хааччыллыыга биир дьиэ кэргэнтэн сайаапка киирбит. Бу туһунан Октябрьскай уокурук  салайааччыта Валентин Эверстов иһитиннэрбит.