Илин эҥэргэ бастакы элбэх этээстээх дьиэ үлэҕэ киирдэ

Бүгүн, ахсынньы 28 күнүгэр, Мэҥэ Хаҥалас улууһун Майа сэлиэнньэтигэр саахалланар туруктаах дьиэттэн көһөрүллүбүт дьоҥҥо элбэх кыбартыыралаах дьиэ аанын тэлэччи аста.

Бу лииптээх элбэх этээстээх дьиэ өрүс уҥуор аан бастакытын тутулунна.

Ил Дархан Айсен Николаев саҥа дьиэ олохтоохторун үөрүүлээх түгэнинэн эҕэрдэлээн туран, подъездтар ыстаарысталарыгар — Анна Климентоваҕа уонна Зоя Герасимоваҕа, ону тэҥэ элбэх оҕолоох ыалларга күлүүстэри туттартаата. Саҥа дьиэҕэ 70 ыал кыбартыыра ылла.

“Илин эҥэргэ аан бастаан лииптээх элбэх этээстээх дьиэ тутулунна. Бэрэсидьиэн Владимир Путин көҕүлээбит национальнай бырайыагын чэрчитинэн олохтоох «Мегино-Строй» хампаанньа тутта. Сотору кэминэн бку эргин маннык тутуулар элбиэхтэрэ, олорорго табыгастаах дьиэлэр өрөспүүбүлүкэ киин куоратыгар эрэ буолбакка, улуустарга эмиэ тутуллуохтара диэн эрэллээхпин», — диэтэ өрөспүүбүлүкэ баһылыга.

Айсен Николаев Сергеевтар уонна Габышевтар дьиэ кэргэттэрин саҥа кыбартыыраларыгар сылдьан, тутуу хаачыстыбатын уонна элбэх оҕолоох ыалларга тэриллибит усулуобуйаны табыгастааҕынан сыаналаата.

«Саҥа дьыл иннинэ саҥа кыбартыыралары ылбыппытыттан олус үөрэбит. Бу биһиги дьиэ кэргэҥҥэ бэртээхэй бэлэх буолар. Бу кыбартыыра иэнинэн бу иннинэ олорбут дьиэбитинээҕэр өссө улахан. Урукку кыбартыырабыт ситэтэ суох хааччыллыылаах этэ. Билигин көһөрүү бырагырааматын көмөтүнэн өссө табыгастаах усулуобуйаҕа олоруохпут. Кэлэр сылга манна көһүөхпүт», — диэн Сергеевтэр үөрүүлэрин үллэстэллэр.

Саҥа дьиэ 7 этээстээх, тутуу уопсай иэнэ 7,5 тыһыынча квадратнай миэтэрэттэн тахса. Сакаасчытынан «СӨ Дьиэ тутуутун дириэксийэтэ» ГКУ буолар, бырайыагы «СПДС» ХЭТ оҥорбут, оттон тутуу үлэтин “Мегино-Строй” ПК хампаанньа ыыппыт.

2019 сылтан Мэҥэ Хаҥалас улууһугар хаарбах туруктаах дьиэттэн көһөрүү бырагырааматын чэрчитинэн, уопсайа 42 тыһыынчаттан тахса кв.м иэннээх 25 элбэх кыбартыыралаах дьиэ үлэҕэ киирбит, диэн иһитиннэрэр Ил Дархан, бырабыыталыстыба пресс-сулууспата.