Илиҥҥи экэнэмиичэскэй Х пуорумҥа Саха сирэ улахан экспозицияны туруоруоҕа

Владивосток куоракка ыытыллар пуорумҥа Саха сирэ  улахан экспозицияны билиһиннэриэҕэ. Ол курдук Саха сирэ онус төгүлүн балаҕан ыйын 3-6 күннэригэр ыытыллар Илиҥҥи экэнэмиичэскэй пуорумҥа биир кэлим экспозицияны туруоруоҕа.

«Улица Дальнего Востока» диэн быыстапка былаһааккатыгар биһиги өрөспүүбүлүкэбит инвестиционнай, туристическай сайдыыны көрдөрөр, саҥа инновационнай бырайыактардаах култуурунай нэһилиэстибэни билиһиннэриэ. Экспозиция сэттэ тиэмэлээх секторга арахсыаҕа.

Үбүлүөйдээх экэнэмиичэскэй пуорум биһиги эрэгийиэммитигэр улахан суолталаах. Саха сирэ Уһук Илин сайдыытын биир көхтөөх кыттааччыта буолар. Ол курдук аныгы технологиялар, инфраструктура сайдыыта, айылҕа харыстабыла, төрүт култуура сайдыытыгар барытыгар кылаатын киллэрэр.