Илиҥҥи экэнэмиичэскэй пуорум-2025 сүрүн тиэмэтэ быһаарылынна

Владивостокка балаҕан ыйын 3-6 күннэригэр ыытыллар Илиҥҥи экэнэмиичэскэй пуорум-2025 сүрүн тиэмэтинэн “Уһук Илин – эйэ уонна сайдыы иһин бииргэ үлэлэһии” буолуоҕа.

“Илиҥҥи экэнэмиичэскэй пуорум – Арассыыйаҕа эрэ буолбакка, ону таһынан аан дойдуга экэниэмикэ, бэлиитикэ уонна социальнай эйгэ боппуруостарын ырытар кыаҕы биэрэр. Бу Азия Тиихэй акыйаан эрэгийиэннэрин кытта бииргэ үлэлэһиини сайыннарыыга суолталаах былаһаакка. Быйылгы пуорум сүрүн тиэмэтэ — “Уһук Илин – эйэ уонна сайдыы иһин бииргэ үлэлэһии”. Хомойуох иһин, аныгы кэмҥэ туох буоларын көрөбүт: сорох ыкса олорор ыаллыы дойдуларбыт олоҕо суох бэлитиичэскэй бэрдимсийиилэрэ биисинэс, гуманитарнай уонна билим хайысхатыгар бииргэ үлэлэһиини буортулуур. Ол эрээри, Арассыыйа уруккутун курдук бииргэ үлэлэһэргэ аһаҕас. Уһук Илиҥҥэ тас сибээс бииргэ үлэлэһиитин ураты эрэсиимэ үлэлиир. Урутаан сайыннарар сир, Владивосток көҥүл пуордун резиденнэринэн тас дойду инвестордара эмиэ буолаллар. Билигин биһиги саҥа кыаҕы – олохтоох уонна тас дойдулар бииргэ үлэлэһэр тэрилтэлэрин дойдуларын экэниэмикэтин бөҕөргөтөр икки өртүттэн табыгастаах, норуоттар икки ардыларынааҕы урутаан сайыннарыыны тэрийэбит. Бииргэ үлэлэһии өссө биир хайысхата – муора хотугу пуорда, Европа уонна Уһук Илин икки ардыларыгар быһалыы тырааныспар суола. Бу уонна да атын тиэмэлэри пуорум кэмигэр кэпсэтиэхпит” – диэн  РФ Бырабыыталыстыбатын бэрэссэдээтэлин солбуйааччы – РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев эттэ.

Санатан суурйдахха, Илиҥҥи экэнэмиичэскэй пуорум былырыыҥҥы түмүгүнэн Саха сирэ 163 млрд. солк. уопсай суумалаах 25 сөбүлэҥи түһэрсибитэ. Бөдөҥ бырайыактар – Найба муора пуордун уона Тиихэй акыйаан тимир суолун тутуу,  Өймөкөөн улууһун сылааһынан хааччыллар систиэмэтин уларытыы, “Синергия Арктики” бырайыагы кэҥэтии, ону тэҥэ, Дьокуускай куорат маастар-былаанын олоххо киллэрии.

Сиһилии манна ааҕыҥ.