Илиҥҥи экэнэмиичэскэй пуорум чэрчитинэн Владивостокка мас-рестлиҥҥэ аан дойдутааҕы турнир ыытыллыаҕа

Владивосток куората «Саха сирин тимир суоллара» акционернай хампаанньа Куубагын иһин мас-рестлиҥҥэ аан дойдутааҕы турниры ыытарга бэлэмнэнэр.

Помостка уон икки дойдуттан күрэсчиттэр күүстэрин холонуохтара. Оттон Саха сириттэн аан дойду чөмпүйүөнэ Семен Ануфриев кыттыаҕа. Мас-рестлинг Владивостокка ыытыллар Илиҥҥи экэнэмиичэскэй пуорум чэрчитинэн ыытыллыаҕа. Аан дойду бастыҥ күүстээхтэрин күрэхтэһиитин балаҕан ыйын 5 күнүгэр ыытарга былаанныыллар.

Мас-рестлиҥҥэ Ангола, Египет, Замбия, Индия, Казахстаан, Конго, Кыргызстаан, Марокко, Монголия, Нигерия, Арассыыйа, Сирия, Туркменистан уонна Узбекистан бэрэстэбиитэллэрэ бэйэлэрин маастарыстыбаларын көрдөрүөхтэрэ.

Кыттааччылар ортолоругар аан дойду чөмпүйэнээттэрин хас да төгүллээх призердара кытталлара күүтүллэр. Арассыыйа сүүмэрдэммит хамаандатын састаабыгар икки күрэсчит сайаапкаламмыт – Саха сириттэн Семен Ануфриев уонна Москва куораттан Дарья Миронова.

Турнир балаһыанньатынан, 16 кыттааччы сэрэбиэйи тардыахтара, ол түмүгүнэн кинилэр түөрт хамаандаҕа арахсыахтара. Хамаанда аайы түөртүү күрэсчит киирэр – икки эр киһи (80 кг диэри) уонна икки дьахтар (65 кг диэри). Киирсиилэр эргиир тиһигинэн «биир-бииргэ» ньыманан ыытыллыахтара. Саамай элбэх очукуону ылбыттар кыайыылааҕынан тахсыахтара. Кинилэри Куубактарынан, мэтээллэринэн, дьупулуомнарынан уонна анал бириистэринэн наҕараадалыахтара.