ВЭФ-2024: Пуорумҥа Саха сиригэр пилота суох көтөр тиһик киинин үлэтин туһунан кэпсээтилэр

Саха сиригэр Хотугулуу-Илиҥҥи федеральнай университет баазатыгар тэриллибит пилота суох көтөр тиһик киинэ Арктика территорияларыгар ыччаты үөрэтиини тэрийэр.

Бу туһунан ХИФУ ректора Анатолий Николаев Илиҥҥи экэнэмиичэскэй пуорумҥа (ВЭФ) иһитиннэрдэ.

«Киин Арктика зоналарыгар пилота суох көтөр тиһиги сайыннарыыга болҕомтотун уурар. Ыччакка бу салааны тарҕатыыга Дьааҥы улууһугар оскуола үөрэнээччилэригэр конструкциялааһын, салайыы уонна бырагыраамалары ырытан оҥоруу хайысхаларынан куурустар ыытыллыбыттара. Балаҕан ыйыгар Анаабыр улууһугар исписэлииһи ыытарга былаанныыбыт», — диэн Анатолий Николаев кэпсээтэ.

Саҥа киин аһыллыаҕыттан пилота суох көтөр аппарааттары үөрэтиигэ факультативнай-практическай дьарыктары ыыталлар. Идэни үрдэтэр куурустары эбии үөрэхтээһин педагогтарыгар  уонна Саха сирин олохтоохторугар тэрийэллэр. Киини тэрийии бырайыага университет сайдыытыгар куонкуруска кыайыылаахтартан биирдэстэрэ буолбута. Бырайыак «Приоритет-2030»г судаарыстыбаннай бырагыраама чэрчитинэн өйөбүлү ылбыта.

Илиҥҥи экэнэмиичэскэй пуорум бу сыл балаҕан ыйын 3-6 күннэригэр Владивосток куоракка Уһук Илиҥҥи федеральнай университет кампуһун былаһааккатыгар ыытыллар. Пуорум сүрүн тиэмэтэ — «Дальний Восток-2030. Объединим усилия, создавая возможности».