Инбэлиит-оҕолорго айаннарын ороскуота төлөнөр буолла

2023 сыл тохсунньу 1 күнүттэн онкологическай, иммунологическай, гематологическай ыарыылардаах уонна бүөрдэрэ ыалдьар инбэлиит-оҕолор эмтэнэ баралларыгар айаннарын ороскуота төлөнөр буолуоҕа. Бу туһунан уураахха РФ Бырабыыталыстыбатын бэрэссэдээтэлэ Михаил Мишустин илии баттаата.

Бу быһаарыы искэни утары охсуһар, иммуномоделирующай терапияны барар уонна гемодиализка сылдьар инбэлиит-оҕолорго сыһыаннаах. Төрөппүттэригэр уонна арыаллааччыларыгар эмиэ төлөнөр. Сөмөлүөт төлөбүрэ уһун айаҥҥа эрэ төлөнөр, холобур, тимир суолунан 12 чаастан ордук кэмҥэ айанныыр буоллахха, эбэтэр, 1 тыһыынча килэмиэтиртэн ыраах сир буоллаҕына.

Урут систэрин тоноҕоһо ыалдьар оҕолор, ону тэҥэ, Уһук Илиҥҥэ, эбэтэр, тимир суола суох сирдэргэ олорор инбэлиит-оҕолор эрэ сөмөлүөтүнэн босхо көтөр бырааптаахтара.

Инбэлиит оҕолор эмтэнэр сирдэригэр кэлэр-барар бырайыастара социальнай өҥө нобуорун (НСУ) иһинэн бэриллэр. Бу өҥөлөргө эминэн хааччыйыы, санаторийга-куруорка путевканы биэрии уонна куорат таһыгар айанныыр электропоезтарга бырайыас киирэр.