Инбэлиит оҕотун сүтэрэн

Бэҕэһээ Дьокуускайдааҕы 1-кы нүөмэрдээх полиция дьуһуурунай чааһыгар инбэлиит оҕом сүттэ диэн олохтоох дьахтар тиийэн сайабылыанньа суруйбут.

Бу кэмҥэ мэдиссиинэ тэрилтэтиттэн полицияҕа инбэлиит кыра оҕону аҕаллылар диэн иһитиннэрбиттэр.

Полиция быһаарбытынан, оҕо дьиэтин тэлгэһэтигэр оонньуу сылдьыбыт уонна Покровскай шоссеҕа тахсан хаалбыт. Ааһан иһэр дьахтар оҕону көрөн мунан хаалбыт дии санаан чугастааҕы мэдиссиинэ тэрилтэтигэр илдьибит.

Оҕону ийэтигэр биэрбиттэр. Дьокуускайдааҕы ИДьМ полиция салаатын сокуоннай саастарын туола илик оҕолор дьыалаларын иниспиэктэрдэрэ сэрэтэр үлэни ыыппыттар. Бу туһунан ИДьМ Дьокуускайдааҕы салаата телеграм-ханаалыгар суруйар, төрөппүттэри сэрэхтээх буолуҥ диэн этэр.