Инбэлиит оҕону көрүүгэ бэриллэр төлөбүргэ уларыйыы киирдэ

2024 сыл тохсунньу 1 күнүттэн инбэлиит оҕону көрүүгэ бэриллэр ыйдааҕы төлөбүргэ саҥа быраабыла киирдэ. Саха сиригэр маннык төлөбүрү 658 киһи ылар диэн Социальнай пуонда салаата иһитиннэрэр.

Бу төлөбүр I группалаах инбэлиит оҕону көрөн олорор төрөппүккэ бэриллэр. Урут төлөбүр үлэлээбэт төрөппүттэргэ эрэ ананара. 2024 сылтан инбэлиит оҕону көрөр-истэр эрээри, быстах үлэҕэ, эбэтэр, күн аҥаарыгар, эбэтэр, тэйиччиттэн  үлэлиир дьоҥҥо (төрөппүттэргэ, эппэкииннэргэ, попечителлэргэ) төлөнөр буолла.

Бу өҥөнү «Госуслуги» портал, Социальнай пуонда, Элбэх өҥөнү оҥорор киин нөҥүө сайабылыанньа биэрэн, ылыахха сөп.

Санатар буоллахха, инбэлиит оҕолоох төрөппүттэр:

• субуруччу 24 күнү өрөбүл курдук ылыахтарын сөп;
• оҕолорун кытта стационарга сытыахтарын сөп;
• табыгастаах кэмҥэ, хаһан баҕарар уоппуска ылыахтарын сөп;
• араас чэпчэтиилэринэн туһаналлар.

Толору үлэ күнүгэр үлэлии тахсар буоллаҕына, төрөппүт 5 күн иһинэн Социальнай пуондаҕа биллэриэхтээх.  Оннук гымматаҕына, сокуону кэһэн ылбыт төлөбүрүн сууматын төнүннэриэхтээх.