Муомаҕа — сэргэх тэрээһиннэр

Муома улууһугар инбэлииттэргэ аналлаах тэрээһиннэр ахсынньы 1 күнүттэн саҕаламмыттара.

Инбэлииттэр уопсастыбаларын (салайааччы Михеева А.В.) тэрээһининэн Тымныы оҕонньор сиэнинээн Хаарчааналыын, остуоруйа дьоруойдара уонна кэлэр 2023 сыл бэлиэтэ Куруолук көстүүмнээх, ЭКЦ Осикат артыыстара доруобуйаларынан хааччахтаах оҕолору дьиэлэринэн, тэрилтэлэринэн киэргэтиллибит бураан көлөлөөх кэрийэ сылдьан, бэлэхтэри туттардылар. Бэлэхтэр “Ладошка добра” аахсыйа чэрчитинэн тэрилтэлэр, урбаанньыттар, биирдиилээн дьон күүһүнэн хомулуннулар. Ити сиэрдээх аахсыйаҕа кыттыбыт бары биир дойдулаахтарбытыгар истиҥ махталбытын тиэрдэбит.
Инбэлииттэр дэкээдэлэрин иитинэн, чугастааҕы нэһилиэктэри кэрийэн быраастар (педиатр, терапевт, харах, невролог) инбэлииттэри дьиэлэринэн кэрийэн көрдүлэр-иһиттилэр, тустаах сүбэлэри биэрдилэр, эмтэнэллэригэр рецепт суруйдулар, УСЗНиТ (сал Щелканова А.Ф.), ЦЗН (сал. Слепцова С.В.), ПФР (кылаабынай специалист Атласов М.П.), инбэлииттэр уопсастыбаларын салайааччыта Михеева А.В. уонна оройуон дьаһалтатыттан баһылыгы солбуйааччы В.Д.Абрамова үлэлээтилэр. Инбэлиииттэри кытта миэстэтигэр көрсөн кэпсэттилэр, санааларын иһиттилэр, ыйытыыларыгар хоруйдаатылар, саҥа уларыйыылары кэпсээтилэр, кыһалҕаларын туоһуластылар.
Нэһилиэк аайы оройуон дьаһалтата уонна инбэлииттэр уопсастыбалара холбоон инбэлииттэргэ аһынан-үөлүнэн уонна харчынан көмө оҥордулар.
Соболоох уонна Чыыбаҕалаах саҥа үлэлээн эрэр эдэр баһылыктара Павлов Э.Г., Громов И.Б. инбэлииттэр көрсүһүүлэргэ кэлэллэрин хааччыйан, бэйэлэрэ массыынанан тиэйэн биэрбиттэрэ хайҕанар. Соболоох баһылыга инбэлииттэригэр “Фаворит” маҕаһыын сэртипикээттэрин бэлэх уунан дьонун үөртэ. 1 группалаах инбэлиит Н.Г. Хабаров (Магадан), кэһии, бэлэх тутан, үөрүүтүн биллэрэн бэйэтэ айбыт хоһоонун ыалдьыттарга аахта. Чыыбаҕалаах баһылыга Громов И.Б. элбэх инники былааннардааҕын, көрүүлэрдээҕин кулууп дьиэтигэр мустубут ыалдьыттарга уонна биир дойдулаахтарыгар кэпсээтэ. Сайдыы бөһүөлэгин ийэлэрэ бэйэлэрэ баайбыт итии наскыларын мобилизацияҕа барбыт дьонноругар уонна уонна кинилэр дьиэ кэргэттэригэр күүс-көмө буолар ыстаап салайааччытын солбуйааччытыгар В.Д. Абрамоваҕа туттардылар. Көрсүһүү түмүгэр сайдыылар уоллара Дьөгүөрэ Слепцов “Мин барытын ситиһиэм” диэн ырыатын ыллаабытын дьон-сэргэ ытыс тыаһынан арыаллаата. Үс күннээҕи десаҥҥа эдэр кэскиллээх ырыаһыт Василий Слепцов кыттыыны ылан кэрэ ырыалары инбэлииттэргэ бэлэх ууммута көрсүһүүгэ мустубут дьону астыннарда, дуоһутта.

Инбэлииттэр дэкээдэлэрин түмүктүүр биэчэр Арчы дьиэтигэр тэриллиннэ. Оройуон аҕа баһылыга Дмитрий Викторович Аммосов мустубут бары ыалдьыттары истиҥник эҕэрдэлээтэ, доруобуйаны, этэҥҥэ буолууну, ситиһиини баҕарда. Оройуон дьаһалтата сыллааҕы былааныгар урукку кэмҥэ инбэлииттэри кытта үлэҕэ сүүс тыһыынчаны көрөр эбит буоллаҕына, эһиилгиттэн инбэлииттэр уопсасыбаларыгар болҕомто күүһүрүө, көрүллэр үп улаатыа диэн бэлиэтээн эттэ. Итини истэн уопсастыба чилиэннэрэ, бэрэсэдээтэлэрэ (Михеева А.В.) оройуон дьаһалтатын кытта бииргэ үлэлииргэ бэлэмнэрин, өйөбүл баар буоллаҕына үлэлэрин тэтимин күүһүрдэллэрин эрэннэрдилэр.
Тэрээһин кыттыылаахтара бырааһынньыктыы тардыллыбыт остуол тула олорон ирэ-хоро кэпсэттилэр, оонньоотулар, куонкурустарга кытыннылар, кэнсиэр көрдүлэр, ырыа иһиттилэр. Биэчэри олус интэриэһинэйдик оройуоннааҕы музей салайааччыта Алена Егоровна Корякина илээн-саҕалаан ыытта.
Уопсастыба бэрэссэдээтэлэ Михеева Александра Васильевна хас биирдии күрэс, оонньуу кыайыылахтарыгар 500 солкуобай сууммалаах сэртипикээттэри туттартаата. Түмүккэ улуус аҕа баһылыгын социальнай хайысхаҕа солбуйааччы Владилена Дмитриевна Абрамова оройуон иһинээҕи “Мин уонна мин эйгэм” диэн хаартысканан куонкурус уонна “Творчество без границ” диэн инбэлиит оҕолор икки ардыларыгар биллэриллибит уруһуй күрэхтэһиитин түмүгүн иһитиннэрдэ.

Ити курдук инбэлииттэр дэкээдэлэрэ улууспутугар бэрт тэрээһиннээхтик, көхтөөхтүк ыытылынна.

Владилена Абрамова,

Муома.