Хаартыска: Үлэ, социальнай сайдыы министиэристибэтэ.
2021 сылтан өрөспүүбүлүкэҕэ ментальнай кэһиллиилээх дьоҥҥо анаммыт бырайыак үлэлиир. Быйыл бырайыак үлэтэ тохтуохтаах, муус устарга үлэ түмүгүн, социальнай көдьүүһүн ырытан көрүөхтэрэ. Бу бырайыакка социальнай хааччыйыы тэрилтэлэриттэн 12 киһини, дьиэ кэргэттэртэн 25 киһини талбыттара. Кинилэр туспа олороллоругар, үлэ булалларыгар усулуобуйа оҥоһуллубута. Бу туһунан Социальнай хааччыйыы эйгэтигэр бырайыактары олоххо киллэриигэ эрэгийиэннэр икки ардыларынааҕы кэмпириэнсийэ кэмигэр үлэ, социальнай сайдыы миниистирэ Елена Волкова кэпсээтэ.
Хас биирдии кыттааччыга тус бырагыраама оҥоһуллубута. Исписэлиистэр кинилэр бэйэлэрэ баҕаралларын, туспа олорор олоххо түргэнник үөрэнэллэрин туһугар күүскэ үлэлэспиттэрэ. Онон бырайыак кыттааччылара үлэ буларга, үлэлииргэ эмиэ үөрэммиттэрэ кэрэхсэбиллээх. Онон билигин үгүстэрэ үлэ булан, үлэлии сылдьаллар.
Бу бырайыак боломуочуйалаах уорганынан үлэ, социальнай сайдыы министиэристибэтэ, операторынан «ВЭБ.РФ» корпорация, тэрийээччинэн «ВЭБ.ДВ» АУо, толорооччунан Санкт-Петербурдааҕы инбэлиит оҕолоох төрөппүттэр уопсастыбаннай түмсүүлэрин ассоциацията «ГАООРДИ» буоллулар.
— Саха сиргэ үс сыл иһигэр элбэҕи оҥордо, атын эрэгийиэннэр маны хас да сылы быһа ситиһэллэр. Бары көҕүлээһиннэрбитигэр бэрт түргэнник ылсан испиттэрэ. Манна министиэристибэ үлэһиттэрэ интэриэстээхтэрэ көстөр. Онон өрөспүүбүлүкэҕэ социальнай эйгэ сайдыытын үрдүктүк сыаналыыбыт. Бу бырайыак өссө сайдан, кэҥээн иһэригэр баҕарабыт, — диэн «ГАООРДИ» ассоциация уопсастыбаннаһы кытта сибээскэ сулууспатын дириэктэрэ Юлия Гребенкина эттэ.
Кулун тутар 12 күнүгэр кэмпириэнсийэ пленарнай мунньаҕа уонна ырытыһыы буолбута. Манна бырайыак кыттыылаахтара бары уонна Уһук Илинтэн, Башкортостантан, Саратовскай, Челябинскай уобаластартан, өрөспүүбүлүкэтээҕи реабилитационнай, социальнай көмүскэл, дьарыктаах буолуу тэрилтэлэриттэн, уопсастыбаннай түмсүүлэртэн кытыннылар.
— Бырайыак социальнай көдьүүһүн, үтүө түмүктэри ситистэ, тус сыаллаах көрдөрүүлэрин толордо диэн билигин номнуо этиэххэ сөп. Бу бырайыак социальнай хааччыйыы систиэмэтигэр саҥа технологиялары киллэрдэ, кэҥэттэ, — диэн бырабыыталыстыба бэрэссэдээтэлин солбуйааччы Георгий Степанов бэлиэтээтэ.
Социальнай хааччыйыы эйгэтигэр бырайыактары олоххо киллэриигэ эрэгийиэннэр икки ардыларынааҕы кэмпириэнсийэ кулун тутар 12-14 күннэригэр ыытылла турар. Манна бырайыагы ырытыһыыттан ураты доруобуйаларыгар хааччахтаах дьон оҥоһуктарын быыстапката, сувенирдары оҥорууга маастар-кылаастар, төгүрүк остуол, о.д.а. буолаллар.
Саха төрүт аһа. Көбүөрдээх лэппиэскэни сөбүлүүгүт дуо? Оттон сыаҕа буспут лэппиэскэни амсайбыккыт дуу? Маныаха Е.Ф.Кузьмина "Саха…
Үс сыллааҕы өрөспүүбүлүкэ судаарыстыбаннай бүддьүөтүн торумнааһыҥҥа Саха сирин Бырабыыталыстыбата тутаах хайысхаларга гражданнары социальнай өйөөһүнү үбүлээһин…
Саха Өрөспүүбүлүкэтигэр туристическай инфраструктураны сайыннарыыга биир кэлим субсидияны биэриигэ сүүмэрдииллэр. Бу дойду Бэрэсидьиэнэ Владимир Путин…
Ил Түмэҥҥэ “2026 сылга, 2027 уонна 2028 сыллардааҕы былааннаммыт кэмҥэ Саха Өрөспүүбүлүкэтин судаарыстыбаннай бүддьүөтүн туһунан”…
Степан Саргыдаев, Чурапчы улууһун баһылыга: --Чурапчы нэһилиэгин баһылыгыттан саҕалаан улуус баһылыгынан талыллан баһылыктыы уонна өрөспүүбүлүкэ…
Саха сиригэр бу бырайыак иитинэн өрөспүүбүлүкэ 1049 олохтооҕо үөрэнэр. --Өрөспүүбүлүкэ олохтоохторун үөрэтии 82 бырагырааманан тэрилиннэ.…