Инбэлииттэри чөлгө түһэрии боппуруоһун көрдүлэр

Бырабыыталыстыба бэрэссэдээтэлин солбуйааччы Георгий Степанов Ил Дархан иһинэн Инбэлииттэр дьыалаларыгар сэбиэт мунньаҕын ыытта.

Мунньахха 2022 сылга инбэлииттэри реабилитациялыыр үлэ түмүктэрин көрдүлэр. Үлэ уонна социальнай сайдыы, үөрэҕирии уонна наука, спорт уонна физическэй култуура миниистирдэрэ, дьарыктаах буолуу кэмитиэтин салайааччыта иһитиннэриини оҥордулар.

Бүгүҥҥү күҥҥэ өрөспүүбүлүкэҕэ 56 тыһыынча инбэлиит, ол иһигэр 6 тыһыынчаттан тахса инбэлиит оҕо баар. Доруобуйа харыстабылын хайысхатынан реабилитация 1-кы түһүмэҕин 8 тымыр отделениетыгар, 2 эрэгийиэннээҕи тымыр киинигэр, 2-с түһүмэҕин – 6 мэдиссиинэ тэрилтэтэ, 3-с түһүмэҕин – 3 мэдиссиинэ тэрилтэтэ оҥороллор.

Үлэ, социальнай сайдыы министиэристибэтин хайысхатынан 7 реабилитационнай киин, ол иһигэр 4 – оҕолорго аналлаах үлэлиир. Сыллата 5 тыһыынчаттан тахса оҕо, 3 тыһыынчаттан тахса улахан киһи кэлэн, реабилитация өҥөлөрүн ылаллар. Үөрэх министиэристибэтин хайысхатынан психологическай-педагогическай реабилитацияны 6 тыһыынча кэриҥэ оҕо ааһар.

Мунньахха инбэлииттэргэ үлэ миэстэтин таһаарыы туһунан боппуруоһу эмиэ көрдүлэр. 2022 сылга инбэлииттэри үлэҕэ ыларга 1059 тэрилтэҕэ 3041 үлэ миэстэтигэр квота олохтоммут. Бу чэрчитинэн, 2255 киһи үлэлии сылдьар. Бу квота 74,2 %-на буолар.

Георгий Степанов инбэлииттэргэ реабилитация, абилитация үлэтэ тиһиктээхтик ыытылларын бэлиэтээтэ. Ону тэҥэ, инбэлииттэри үлэҕэ ылыыга квотаны толорбот үлэни биэрээччилэр испииһэктэрин оҥорорго сорудахтаата.

Ил Дархан, бырабыыталыстыба дьаһалтатын пресс-сулууспата.