«Индигиир өрүскэ уу таһыма түһэн эрэр»

Ааспыт сууккаҕа Индигиир өрүскэ уу таһыма 2-10 см түспүтэ бэлиэтэнэр. Бу туһунан СӨ Гражданскай оборуона уонна куттала суох буолууну хааччыйыы миниистирин бастакы солбуйааччы Айаал Вензель брифиҥҥэ иһитиннэрдэ.

Сарсыарда 8 чаастааҕы туругунан, Өймөкөөн сэлиэнньэтин аттыгар уу таһыма 578 см тиийбит, ааспыт 4 чаас иһигэр 2 см түһүү бэлиэтэннэ. Аллараа өттүгэр, Юрта гидропуоска уу таһыма 887 см тиийдэ (4 чаас иһигэр 23 см үрдээһин, кутталлаах таһыма 1089 см). Уус-Ньара бөһүөлэгэр таһыма 535 см, 4 чаас иһигэр 9 см түһүү. Хонуу сэлиэнньэтин аттыгар уу таһыма 637 см, 10 см түһүү. Ньара үрэххэ Ала-Чубук гидропуоһугар – 635 см (9 см түһүү).

Айаал Вензель Өймөкөөн оройуонугар суһал балаһыанньанан күн бүгүҥҥэ диэри 347 тиэргэн ууга барбытын, ол иһигэр 93 олорор дьиэ, онно 1527 киһи, ол иһигэр 405 оҕо олорорун бэлиэтээтэ. Ону тэҥэ «Оймякон» эрэгийиэннээҕи суол уонна «Колыма» федеральнай суол учаастактара уонна биир социальнай суолталаах эбийиэк (оскуола) ууга барбыттар.

Муома улууһугар 28 тиэргэн ууга барбыт, онно 30 киһи олорор. Абый улууһугар Кэбэргэнэ сэлиэнньэтигэр 7 тиэргэн ууга барбыта.

Ааспыт сууккаҕа Өймөкөөн оройуонугар матырыйаал саппааһын тиэрдиигэ үлэ ыытылынна. Маны тэҥэ Дьааҥытааҕы этэрээттэн 5 быыһааччы Хонуу нэһилиэгэр көһөрүллүбүтэ. Суһал бөлөх уонна Быыһыыр сулууспа быыһааччылара үлэлииллэр.

“Өймөкөөн улууһугар матырыйаал саппааһа уонна ас-үөл хааччыллыыта тиэрдилиннэ. Бүгүн матырыйаал саппааһын уонна бырабыыталыстыба оробуочай  хамыыһыйатын тиэрдэргэ “Полярнаые авиалинии” хампаанньа эбии сөмөлүөтэ көтөрө былааннанар. Маны тэҥэ ууга барбыт нэһилиэнньэлээх пууннартан оҕолору көһөрүү былааннанар. Балаһыанньа куруук хонтуруолга турар”, — диэн Айаал Вензель тоһоҕолоото.

Сиһилии: https://www.sakha.gov.ru/news/8429