“Индигирка” салаат омуктары сомоҕолуур

Кэлиҥҥи сылларга киин куораппытыгар араас омук кафета, эрэстэрээнэ дэлэйэн, ыраата айаннаабакка да, кытай, узбек, бүрээт (киһи итинник ааттыы туруон сөп) национальнай бүлүүдэтин амсайыахха сөп.

Биллэн турар, үгүс эрэстэрээн «европейскай», «паназиатскай» диэн ааттаан, араас муора үүнээйититтэн, балыктан, эттэн, быһата, күн талбытын барытын амсатыан сөп.

Устудьуоннар “уйалара”

Биир күн анаан, ыраата барбакка, Дьокуускай куорат хабыллар киинигэр турар үс-түөрт кафеҕа уонна эрэстэрээҥҥэ киирэн, менюларын анаан үөрэттим. Сүрүн соругум — Норуоттар сомоҕоһууларын күнүн көрсө бу тэрилтэлэр сүрүннээн ханнык норуоттар астарын астыылларын, дьон ордук туох бүлүүдэни сөбүлээн сакаастыырын, менюга саха аһа төһө баарын билсиһии.

Бастакынан «Салам Пополам» диэн илиҥҥи куукуна кафетыгар сырыттым. Манна устудьуоннарга босхо чэй уонна лэппиэскэ биэрэллэр үһү диэни эрдэттэн истибитим. Кырдьык, устудьуон-аймах анаан мустар сирэ бу эбит. Мин уочаракка турар оҕолорго чугаһаан, кэпсэтэн билбитим, Дьокуускайдааҕы сервис уонна технология кэллиэһин устудьуоннара эбит. Оҕолор бу кафе пловун амсайа кэлэллэр эбит. “Дьиҥнээх узбекскай плов!” дэһэллэр ыччаттар.

Бу устудьуоннары аны мэдисиинэ кэллиэһин кыргыттара солбуйдулар. Дьүөгэлиилэр сөбүлүүр астарын анаан ыла кэлбиттэр. “Саамай минньигэс астааҕыттан өрүү манна кэлэн аһыыбыт” дииллэр кыргыттар.

Салгыы атыылааччы Феруза Муякыпованы кытта кэпсэттим. Лэппиэскэ уонна чэй босхо бэриллэрин ыйыппыппар, сэһэргэһээчим тута хардара оҕуста: «Кырдьык, манна үлэлии кэлээппин кытта «лэппиэскэни уонна чэйи оҕолорго босхо биэрэбит» диэн анаан сэрэппиттэрэ. Маны таһынан, устудьуоннар иэс эмиэ суруттаран аһыыллар. Истипиэндьийэлэрэ кэллэҕинэ, уһаппакка төлөөн иһэллэр. Биһиги астыыр аспытын оҕолор олус сөбүлүүллэр. Сыанабыт да удамыр. Дьонноруттан ыраата сылдьар оҕолору кафе салалтата анаан өйүүр».

Астарын сыаната, кырдьык, удамыр эбит. Холобура, пловтара, мантылара — 200 солкуобай. Национальнай бүлүүдэлэрэ — плов, «Ташкент» салаат уонна «Узбектыы ыһаарыламмыт эт». «Ташкент» салаат ырысыаба бэрт судургу — редька, оҕурсу, буспут эт, горох, сымыыт. Маны майонеһынан эбэтэрсүөгэйинэн тумалыыгын.

Хаан, харта «ийэтэ-аҕата» — манна!

Илиҥҥи куукуна аһын кытта билсэн баран, «Застава» эрэстэрээҥҥэ тиийдим. Бу манна сүрүннээн нуучча куукуната буолааччы. Ол эрээри менюларын кытта билсэн баран, соһуйдум аҕай. Дьэ, бу манна баар эбит, хаан, харта, убаһа этин, таба тылын «ийэтэ-аҕата»! Администратор Дария Соловьева Мэҥэ Хаҥаластан сылдьар эбит.

Кэпсэтиибитин саха астарыттан саҕалаатыбыт. Хаан, харта манна “олохсуйбуттара” ырааппыт.

“Биһиэхэ сүрүннээн нууччалар сылдьаллар. Саха астарын наһаа сөбүлээн амсайалларын иһин, анаан менюбутугар киллэрбиппит. Хааны, хартаны олус сөбүлүүллэр” диэн бэлиэтиир Дария Соловьева.

Бүлүүдэлэрин да ааттарыттан киһи араас бүлүүдэни сакаастыан сөп. Менютугар састааба барыта сылдьар. Холобурга, аҕыйах ырысыабы билиһиннэриим. фольгаҕа үтүллүбүт маринованнай лууктаах убаһа этиттэн бүлүүдэ «Саха этэ» диэн ааттаах. Сыаната ботуччу — 1275 солкуобай. Үтүллүбүт брокколи хаппыстаны кытта кыһыл отон тумалаах таба этэ — 770 солкуобай. Сыыры уонна кедр эриэхэтин кытта духуопкаҕа үтүллүбүт тууччах (нельма) кыһыл отон туманы кытта бэриллэр бүлүүдэ «Кэрэ Куо» диэн ааттаах. Сыаната — 1010 солкуобай. Ити курдук, балыктан араас бүлүүдэ менюга дэлэй.

«Саха аһын бүлүүдэлэрэ» диэн туспа меню баар. Онно «Индигирка» салаат бастакынан турар. Ырысыаба: оҕурсу, луук, кыһыл искэх, күөх оҕуруот аһа тумалаах мас арыыта. Сыаната (150 г) — 550 солкуобай. Тыл эбиликтээх саламаат (130 г) — 220 солкуобай.

Бу саха аһын бүлүүдэтин кытта «Славянская мясная нарезка» — куурусса рулета, оҕуруот астаах куурусса түөһэ, духуопкаҕа үтүллүбүт сибиинньэ этэ — 550 солкуобайга сакаастыан сөп. «Славянское золото» диэн тууһаммыт сыа үс көрүҥэ хара килиэби кытта бэриллэр. Сыаната — 630 солкуобай. Ити нуучча норуотун бүлүүдэтэ.

Убаһа этэ уонна Халыма балыга “күннүүллэр”

Салгыы «Кубик» эрэстэрээҥҥэ сылдьан, менюттан олохтоох икки ас бүлүүдэтин буллум. Ол «Индигирка» салаат уонна кыһыл отонтон оҥоһуллубут убаҕас тума (соус). Эрэстэрээн администратора Кирилл Кириллин бэлиэтииринэн, араас омук дьоно саамай сөбүлүүр салаата “Индигирка”. Балыктарын Орто Халыматтан сакаастыыллар эбит.

Хаартыска Кирилл Кириллин тиксэриитэ.

Куорат хабыллар киинигэр турар «Бекетовъ» нуучча куукунатын кытта билистим. Манна менюлара болҕомтобун тарта. Ол курдук, бүлүүдэ аайы «илии оҥоһуга», «олохтоох бородууксуйа», «оһохтон тута», «саҥа көрүҥ», «ураты көстүү» диэн ыйаллар эбит. Онон эрэстэрээҥҥэ кэлбит киһи бүлүүдэ аатыгар эрэ буолбакка, бу ыйынньыкка болҕомтотун эмиэ ууран сакаас оҥорор эбит.

Аныгы куукуна кафетынан аатырар «Mone» кафе Наука академиятын ойоҕоһугар турар буолан, манна эмиэ киһи хото сылдьар эбит. Кафе администратора Алина Слепцова интернациональнай кэлэктиип үлэлиир кафетыгар туох бүлүүдэлэр баалларын билиһиннэрдэ.

Манна эмиэ саха аһа үгүс. Саламаатыттан саҕалаан убаһа этигэр тиийэ араас бүлүүдэни астыыллар эбит. Дьон сөбүлээн сакаастыыр салаата эмиэ — “Индигирка”.

Араас омук дьоно — иллээх кэлэктиип

…Бу эрэстэрээннэри, кафелары кытта билсэ сылдьан, барыларыгар араас омук ыччаттара биир хамаанда буолан үлэлии сылдьалларын бэлиэтии көрдүм. Кэпсэппит дьонум бары да ону киэн тутта бигэргэтэллэр. «Араас омук дьоно буоламмыт, килийиэннэрбитин кытта алтыһарбытыгар, үлэлиирбитигэр чэпчэки. Биһиэхэ араас омуктар сылдьаллар. Онон менюну аттаран оҥорууга норуокка сөбүлэнэр бүлүүдэлэр хайаан да баар буолалларын учуоттуубут» диэн бэлиэтииллэр администратордар.

Сылдьыбыт эрэстэрээним тухары араас омук сөбүлээн сакаастыыр бүлүүдэтинэн «Индигирка» уонна «Саламаат»  буолалларын этэллэр. Онон эрэстэрээннэргэ барытыгар норуоттары сомоҕолуур аһынан Саха сирин «визитнэй карточкатынан» аатырар астар буолбуттар.