Индияҕа кутталлаах Нипах вируһа булулунна

Индия Калькутта куоратын чугаһыгар эмтэммэт Нипах вируһа тарҕаммыта бэлиэтэннэ. Билигин биэс киһи ыалдьыбыт, сүүсчэкэ киһи харантыыҥҥа киллэриллибит. Ыалдьыбыт дьону эмтииргэ анаммыт препараттар эбэтэр вакциналар билиҥҥитэ суохтар диэн «Газета.Ru» суруйар.

Индия былаастара Арҕаа Бенгалия штатыгар Нипах вируһа күөдьүйбүтүн бигэргэттилэр. Билиҥҥи туругунан, биэс киһи вируска сутуллубута бигэргэннэ, ыалдьыбыттар — мэдиссиинэ үлэһиттэрэ. Биир медсиэстэрэ комаҕа киирбит.

The Economic Times суруйарынан, дьахтар анаалыс ылыллыан иннинэ өлбүт ыарыһаҕы көрбүт-истибит. Ыалдьыбыт дьону кытта алтыспыт сүүсчэкэ киһи билигин харантыыҥҥа сытар. Туристарга сэрэхтээх буолуу үрдүкү миэрэлэрин тутуһарга сүбэлииллэр.

Арассыыйаҕа Нипах вируһугар сутуллуу түбэлтэтэ бэлиэтэнэ илик диэн Роспотребнадзор иһитиннэрдэ. Биэдэмистибэ ыарыы сибикилэрэ (үрдүк температура, сөтөл, күүстээх төбө ыарыыта) көһүннэҕинэ, бырааска тутатына көрдөрүнэргэ ыҥырда.