“Инники идэҕэ хардыы” эдэр чинчийээччилэр пуорум кыайыылаахтарын аата билиннэ

Ахсынньы 11-12 күннэригэр Дьокуускайдааҕы тыа хаһаайыстыбатын тиэхиньикумугар “Инники идэҕэ хардыы” эдэр чинчийээччилэр XVIII пуорумнара буолан ааста. Быйылгы тэрээһин уһулуччулаах бэлитиичэскэй диэйэтэл Егор Борисов 70 сааһыгар ананна.

Пуорум 18 сыл устата үүнэр көлүөнэ интеллектуальнай уонна айар кыаҕын сайыннарар соруктаах ыытыллар. Үөрэх уонна билим министиэристибэтэ, Идэҕэ үөрэтэр тэрилтэлэри сайыннарар институт, Дьокуускайдааҕы тыа хаһаайыстыбатын тиэхиньикума салайан ыыттылар.

Пуорум икки күн устата барда. Түмүктүүр түһүмэххэ олоҕурбут көрүҥүнэн 709 үөрэнээччи, устудьуон кытынна. Бастакы күн билим-быраактыка кэмпириэнсийэтэ, инженернэй бырайыактар быыстапкаалара, «Digital IDea» цифровой быһаарыылар, «Лидер бережливости» күрэстэр, «Марафон бизнес-идей» хамаанданан дьыалабыай оонньуу буолла. Бэҕэһээ саамай кэрэ көстүүлээх тэрээһин ыытылынна – “Цветочная феерия” эдэр модельердар, дизайнердар бэстибээллэрэ.

Ону тэҥэ, пуорум чэрчитинэн, быйыл хаһааҥҥытааҕар да элбэх 5714 кыттааччылаах  тэйиччиттэн интэриниэт-олимпиаданы уонна “Юный мастер” медиакуонкуруһу тэрийдилэр. Пуорум иитинэн барыта 32 идэҕэ үөрэтэр тэрилтэттэн, 167 оскуолаттан итиэннэ 35 уһуйаантан 6 тыһ. тахса киһи кытынна. Кинилэр үлэлэрин, бырайыактарын 95 эспиэрт сыаналаата. Бастыҥ үлэлээхтэр салгыы Бүтүн Арассыыйатааҕы тэрээһиннэргэ кыттарга мэктиэлэннилэр.

Ыччат чинчийэр үлэнэн дьарыктанарыгар өйөбүллэрин иһин педагогтарга уонна производственнай үөрэх маастардарыгар махтал тылларын Идэҕэ үөрэтэр тэрилтэлэри сайыннарар институт дириэктэрэ Лилия Иванова эттэ.

“Пуорум бары кыттыылаахтарыгар махтанабын, өрүү бу курдук өрө күүрүүлээх, айымньылаах, тулаҕытыгар баары билэр-көрөр дьоҕурдаах буолуҥ уонна билимҥэ бэйэҕит кылааккытын киллэрэ туруҥ! Бүгүн федеральнай былаас ордук болҕомтону Арассыыйа технологическай суверенитетыгар уурар. Биһиги дойдубут бигэ туруктаныытын, инники сайдыытын түстээччилэр эһиги буолаҕыт”, – диэн Лилия Михайловна бэлиэтээтэ.

Идэҕэ үөрэтэр тэрилтэлэри эриэйтиннээһин түмүгүнэн, “Инники идэҕэ хардыы” билим улахан көһө сылдьар кубогын Н.Г.Чернышевскай аатынан Бүлүүтээҕи профессиональнай-педагогическай кэллиэскэ туттардылар. Бу туһунан Идэҕэ бэлэмниир үөрэх тэрилтэлэрин сайыннарар институт сырдатар.