“Инники идэҕэ хардыы” пуорумҥа эдэр чинчийээччилэр 250-тан тахса дакылааты киллэрдилэр

Билим чинчийиитинэн дьарыктанар үөрэнээччилэр уонна устудьуоннар дакылааттарын бүгүн, Саха сирин уһулуччулаах бэлитиичэскэй диэйэтэлэ Егор Борисов 70 сааһыгар аналлаах “Инники идэҕэ хардыы” эдэр чинчийээччилэрин иитинэн буолбут билим-быраактыка кэмпириэнсийэтигэр кэпсээтилэр.

Тэрийээччилэр үлэлэри сэттэ симпозиумҥа араардылар: «Инженернэй дьыала, технологиялар уонна тиэхиньиичэскэй билим», «Доруобуйа харыстабыла уонна мэдиссиинэ билимэ», «Тыа хаһаайыстыбата уонна тыа хаһаайыстыбатын билимэ», «Уопсастыба туһунан билим» уо.д.а. Барыта 254 дакылаат киирдэ. Кэмпириэнсийэҕэ  5 оскуола үөрэнээччитэ уонна 31 орто анал үөрэх тэрилтэтин устудьуона кытынна.

Ыччат билимҥэ интэриэһэ араас эбит: бырамыысыланнаска оҥоһуу өйү киллэрииттэн, Арктика улуустарын демографическай балаһыанньатыттан саҕалаан, Саха сиригэр туризмы сайыннарыыга тиийэ.

Дакылааттары өрөспүүбүлүкэ 95 учуонайа, эспиэртиир холбоһук бэрэстэбиитэллэрэ киирбит Сэбиэт көрөр. Кинилэр саҥа саҕалаан эрэ чинчийээччилэр үрдүк таһымнаахтарын, тиэмэлэрин дириҥник өйдүүллэрин бэлиэтээтилэр.

“Мин тустаах пуорумҥа номнуо үс сыл үлэлиибин. Сылтан сыл аайы сэргэх чинчийиилэр тахсан иһэллэрин бэлиэтиэм этэ. Эспиэртэри уустук эрээри, олус интэриэһинэй үлэ күүтэр – сыаналаан бастыҥ дакылааты талан ылыы”, – диэн педагогика билимин хандьыдаата, М.К.Аммосов аатынан ХИФУ сыыппараҕа, технологичпскай үөрэхтээһиҥҥэ кафедратын дассыана, «Информатика уонна вычислительнай тиэхиньикэ» сиэксийэтин бэрэссэдээтэлэ Максим Сорочинскай этэр. Бу туһунан СӨ Идэҕэ үөрэтэр тэрилтэри сайыннарар институт сырдатар.