Инникитин миэдик идэтин баһылыахтаах устудьуоннар “Профессионаллар” эрэгийиэннээҕи чөмпүйэнээккэ күрэхтэһэллэр

В.А.Вонгродскай аатынан Дьокуускайдааҕы мэдиссиинэ кэллиэһигэр “Профессионаллар” чөмпүйэнээт эрэгийиэннээҕи түһүмэҕин аһыллыыта буолла.

Быйыл кэллиэс тоҕус компетенциянан чөмпүйэнээти ыытыы былаһааккатынан буолла. Олор ортолоругар “тактическай мэдиссиинэ” саҥа компетенция баар. Ону тэҥэ, “акушер дьыалата” компетенция сааһынан сүрүн категориятыгар күрэхтэһии аан бастакытын перинатальнай кииҥҥэ ыытыллар. Бу, кыттааччылар саамай аныгы тэрилгэ үлэлииллэригэр уонна дьиҥнээх үлэҕэ ордук чугас усулуобуйаҕа сатабылларын көрдөрөр кыахтаныахтара.

Чөмпүйэнээккэ барыта 87 киһи кыттар, бу мэдиссиинэ хайысхатыгар үөрэтэр кэллиэстэр, тиэхиньикумнар устудьуоннара, ону тэҥэ, юниордар — өрөспүүбүлүкэ араас оскуолаларыттан үөрэнээччилэр. Эдэр профессионаллары тохсунньу 29 күнүттэн саҕаланар тыҥааһыннаах күрэхтэһии күүтэр. Миэдик идэтин баһылыахтаах дьон ыарыһаҕы көрүүгэ-истиигэ сатабылларын, лабораторнай чинчийиини оҥорууну, эми бэлэмнээһини көрдөрүөхтэрэ.

Эрэгийиэннээҕи чөмпүйэнээти Саха сирэ бастакынан саҕалаабыта, тохсунньу 15 күнүттэн Нерюнгритааҕы мэдиссиинэ кэллиэһигэр күрэхтэһии ыытыллыбыта. Саха сиригэр орто анал үөрэх систиэмэтигэр саамай киэҥ далааһыннаах күрэхтэһиигэ 800-тэн тахса киһини түмтэ. Бу туһунан СӨ идэҕэ үөрэтэр кыһалары сайыннарар институт суруйар.