Хаартыска: СИА
Тохсунньу бүтүүтэ Дьокуускай куорат Пригороднай сэлиэнньэтигэр 12 №-дээх оскуола дьиэтигэр 326 миэстэлээх эбии сыһыарыы тутуу аһыллара былааннанар. 30 үөрэнэр кэбиниэттээх үс мэндиэмэннээх тутуу үлэҕэ киирдэҕинэ, үөрэнээччилэр биир симиэнэнэн үөрэниэхтэрэ.
Эбийиэги тутуу 2021 сыл ахсынньытыгар саҕаламмыта. Тутааччы – СӨ Судаарыстыбаннай мунньаҕын дьокутаата Матвей Евсеев генеральнай дириэктэрдээх “Арктик Капитал”, бэдэрээттэһэр тэрилтэ – “ГлавСтрой” хампаанньа. Эбийиэк “Үөрэхтээһин” – “Аныгы оскуола” национальнай бырайыагынан судаарыстыбаннай-чааһынай бииргэ үлэлээһин чэрчитинэн кылгас кэм иһигэр тутулунна.
Бэдэрээтчит сыл устата үлэтин барытын бүтэрэн, 2022 сыл ахсынньыга оскуола салалтата көҥүлү ылбыта.
Оскуола дириэктэрэ Михаил Уйгуров иһитиннэрбитинэн, билигин саҥа дьиэҕэ бэлэмнэнии үлэтэ бара турар.
«Саҥа дьиэҕэ 5-11 кылаастар үөрэниэхтэрэ. Билигин биһиги оскуолабытыгар 669 оҕо үөрэнэр. Эргэ дьиэбит 120 эрэ миэстэлээх, онон икки симиэнэнэн үөрэнэн кэллибит. Саҥа тутуу үлэҕэ киирдэҕинэ, биир симиэнэҕэ үөрэнэр кыахтаныахпыт. Ол гынан баран, быйыл оскуола сүрүн дьиэтин өрөмүөннээһин былааннанар, ол иһин саҥа эрэсииминэн балаҕан ыйыттан үөрэниэхпит”, — диэн дириэктэр санаатын үллэһиннэ.
Дьиэ уопсай иэнэ 5 тыһыынча квадратнай миэтэрэттэн тахса. Бастакы мэндиэмэҥҥэ кинигэ харайар сирдээх бибилэтиэкэ, 160 миэстэлээх остолобуой, мэдиссиинэ пууна, икки лингафоннай кэбиниэт, химия кылааһа, мастарыскыай уонна үөрэнэр кэбиниэттэр үлэлиэхтэрэ. Иккис мэндиэмэҥҥэ 300 миэстэлээх актовай саала, успуорт саалата, технология, биология кэбиниэттэрэ, хореографиянан дьарыктанар саала бааллар. Бүтэһик мэндиэмэҥҥэ муусука саалата, информатика, ОБЖ кэбиниэттэрэ, үөрэнэр кылаастар үлэлиэхтэрэ.
Ону таһынан оскуолаҕа таһыгар успуорт саҥа былаһаакката уонна тренажернай саала бааллар. Үөрэнэр кэбиниэттэр аныгы тэрилинэн сэбилэммиттэр.
Манна даҕатан эттэххэ, Пригороднай оскуолата “Үөрэхтээһин” национальнай бырайыак чэрчитинэн Саха сиригэр “Сыыппаралаах үөрэх эйгэтэ” федеральнай бырайыакка кыттыбыта. 2021 сыллаахха “Точка роста” Естественнай-научнай уонна технологическай хайысхалаах үөрэх киинэ аһыллыбыта. 2014 сылтан оскуолаҕа физико-математика биридимиэттэрин дириҥэтэн үөрэтэр бырагыраама олоххо киллэриллибитэ.
Мария Васильева түһэриилэрэ
Балыксыт күнүн көрсө СӨ Тыатын хаһаайыстыбатын уонна ас-үөл бэлиитикэтин Хоту дойду төрүт салааларын сайыннарыыга уонна…
Госдуумаҕа «Сиэрдээх Арассыыйа— Кырдьык иһин» фракциятын дьокутааттара үлэ миниистирэ Антон Котяковка этии ыыттылар. Бэлиитиктэр сиэннэрин…
Арассыыйаҕа 60-тан үөһэ саастаах суоппардарга сыһыаннаах быраабылалары кытаатыннарарга этии киллэрдилэр. Бу туһунан 2030 сылга диэри…
Таатта улууһугар Ытык Күөлгэ "Манчаары оонньууларынан" бүгүн ыытыллыбыт хотугу дэгит күрэс кыайыылаахтара быһаарылыннылар. Хотугу дэгит…
РФ Үөрэҕириитин уонна билимин министиэристибэтигэр иһитиннэрбиттэринэн, үрдүк үөрэх саҥардыллыбыт тиһигин киэҥник киллэрии 2027–2028 үөрэх дьылыгар…
Саха сириттэн Арина Аулова «World russian Beauty-2025» Бүтүн Арассыыйатааҕы кэрэ куо куонкуруһугар «Эдэр мисс Арассыыйа-2025»…