Ойуулуур-дьүһүннүүр түмэлгэ Арассыыйа худуоһунньуктарын сойууһун чилиэнэ, култуура туйгуна Иннокентий Корякин «Биэс уонус хаарым» диэн быыстапката аһылынна.
Бу кини үһүс быыстапката. Бэйэтэ да сөҕүөн иһин, лоп курдук 50 хартыына көрдөрүүгэ турда. Быыстапка аһыллыытыгар кэлбит биир идэлээхтэрэ, биир дойдулаахтара, худуоһунньук айар үлэтин сүгүрүйээччилэрэ истиҥник эҕэрдэлээтилэр, алгыс тыл үтүөтүн анаатылар, үтүө санааларын тиэрдэн, салама баайан ыйаатылар.
— Бу үлүгэрдээх 50 кыраадыстаах тымныы, дьаҥ-дьаһах турбут кэмигэр ыҥырыыбын быһа гыммакка, анаан кэлбит дьоммор-сэргэбэр ис сүрэхпиттэн махтанабын, — диэн Иннокентий Иннокентьевич эттэ. — Мин санаабар, 50 саас диэн айар-тутар киһиэхэ саҕалааһын эрэ курдук буолар. Быыстапкаҕа киһи туох сыыһалааҕын-халтылааҕын өйдөөн көрөр, тугу ситиспитин торумнуур. Быыстапканы тэрийии аҥаардас худуоһунньуктан эрэ тутулуктаах буолбатах. Элбэх киһи көмөтө баар. Бастатан туран, ойуулуур-дьүһүннүүр түмэлгэ, Худуоһунньуктар сойуустарыгар, багетнай мастарыскыайга, Мария Олесоваҕа, Юрий Спиридоновка, таптыыр кэргэммэр, чугас дьоммор махтаныам этэ. Бэҕэһээҥҥэ диэри 47-48 үлэ баара, онуоха түмэл пуондатыттан эбиллэн, 50 үлэ буолан таҕыста. Бэйэм да соһуйдум.
Быыстапкаҕа худуоһунньук киэҥник биллибит урукку үлэлэрин сэргэ, саҥа хартыыналара эмиэ бааллара кэрэхсэбиллээх.
Иннокентий Корякин олоххо үтүөнү, сырдыгы эрэ булан көрөн, уруккуну-хойуккуну анааран, дьүһүйэр уратылаах. Өҥү-дьүһүнү, уот, күн сырдыгын-күлүгүн, композиция тутулун таба туһанара сөхтөрөр. От-мас хас биирдии сэбирдэҕин, устар уу сүүрүгүн эгэлгэ дэгэтин ойуулууру дэбигис киһи сатаабат буолуохтаах. Хартыыналара дириҥ ис хоһоонноох буолан, толкуйдаталлар, бэйэлэригэр тардар, абылыыр күүстээхтэр. Худуоһунньук хас биирдии дьоруойун тапталынан дьүһүйбүтэ көстөр. Сороҕор ис хоһооно көрдөөх соҕус да буоллар («Атаах боотур», «Дьэдьэнньит боотур», о.д.а.) киһи дьоруойу омнуолуу көрбөт.
Кини урут-уруккуттан саха олоҕун номохторго, үгэстэргэ, фольклорга, итэҕэлгэ тирэҕирэн, көрдөрөр, ойуулуур. Үтүө, сылаас, остуоруйа эйгэлээх айымньылара дьоҥҥо өйдөнүмтүө уонна чугас буолан, дьон-сэргэ биһирэбилин, махталын ылыахтарын ылаллар.
Быыстапка ахсынньы 8 күнүттэн 2024 сыл олунньу 4 күнүгэр диэри үлэлиир. Түмэл үлэлиир чааһа: сэрэдэҕэ — 12.00-20.00 (каасса 19.30 ч. диэри), чэппиэргэ-баскыһыанньаҕа — 10.00-18.00 (каасса 17.30 ч. диэри). Бэнидиэнньик-оптуорунньук — өрөбүл күннэр. Сиһилии 8 (4112) 33-52-79, 8 (4112) 33-52-80 (каасса) төлөпүөннэринэн билсиэххэ сөп.
Ааптар түһэриилэрэ.
Емельян Ярославскай аатынан түмэлгэ Аан дойдутааҕы түмэл күнүгэр анаммыт ''Түмэл түүнэ'' тэрээһиҥҥэ элбэх интэриэһинэй экскурсиялар,…
Өрөспүүбүлүкэ сиригэр-уотугар халаан туругун ыам ыйын 18 күнүгэр ыксаллаах балаһыанньаны сэрэтиигэ уонна туоратыыга хамыыһыйа мунньаҕар…
Халаан уутуттан эмсэҕэлиир нэһилиэктэр ахсааннарыгар урут хаһан да киирбэтэх Хатырык нэһилиэгэ улахан ууга ылларан, олохтоохтору…
Ыам ыйын 17 күнүгэр Нам улууһугар «Библионочь-2024» Бүтүн Арассыыйатааҕы аахсыйа Арассыыйаҕа Дьиэ кэргэн сылын чэрчитинэн…
Бүгүн, ыам ыйын 18 күнүгэр, Аан дойду үрдүнэн Түмэл күнэ бэлиэтэнэр. Бу күнү көрсө Амматааҕы…
Эми-тому атыылаһан баран, аны хайдах иһэр туһунан ыйыыны-кэрдиини (инструкцияны) төһө билсэбитий? «Күҥҥэ үстэ биир табылыакканы…