Иннокентий Малгаров: «Дьоруойдуу быһыылара умнуллуо суоҕа!»

А.Л. Бахсыров аатынан Кыыллаах орто оскуолатын дириэктэрэ Иннокентий Малгаров байыаннай сулууспалаахтар дьиэ кэргэннэригэр көмөлөһүүгэ оскуола кэлэктиибин, үөрэнээччилэрин өттүттэн туох үлэ ыытылларын, олохтон дьоруойдуу туораабыт байыаннай эпэрээссийэ кыттыылаахтарын ааттарын үйэтитии тустарынан кэпсээтэ.

— Дойдубутугар байыаннай эпэрээссийэ ыытылларынан икки дьиэ кэргэнтэн икки аҕа ыҥырыллан барбыттара. Бу уолаттарбыт 2022 с. балаҕан ыйыгар быстах ыҥырыынан Украинаҕа байыаннай эпэрээссийэҕэ чиэстээхтик, дьоруойдуу кыттан, Ийэ дойдуларын туһугар олохторун толук уурбуттара.
А.Л. Бахсыров аатынан Кыыллаах орто оскуолатыгар Аҕа дойдуну көмүскээччи күнүн көрсө ырыаҕа уонна байыаннайдыы кэккэлээн хаамыыга куоталаһыы буолуон иннинэ, Украина сиригэр байыаннай эпэрээссийэ кэмигэр дьоруойдуу охтубут бу оскуола выпускниктарыгар Михаил Дмитриевич Андреевка, Петр Романович Корниловка аналлаах стендэни арыйбыппыт. Андреев Михаил Дмитриевич биһиги оскуолабытыгар 2002-2013 сс. үөрэммитэ. Кини байыаннай сулууспатын чиэстээхтик толоро сылдьан 2022 с. сэтинньи 6 күнүгэр дьоруойдуу суох буолбута. Корнилов Петр Романович оскуолаҕа 1994-2006 сс. үөрэммитэ. Байыаннай эпэрээссийэ кэмигэр ылбыт бааһыттан 2023 с. олунньу 8 күнүгэр олохтон туораабыта.
Оскуолабыт кэлэктиибинэй дуогабарыгар социальнай мэктиэлэр уонна чэпчэтиилэр чаастарыгар уларытыы киллэрдибит. Ол курдук, үлэһит быстах ыҥырыынан байыаннай сулууспаҕа барар түгэнигэр 20 тыһыынча солкуобай, үлэһит эбэтэр үлэһит уола бааһырыы ыллаҕына — 50 тыһыынча солкуобай, үлэһит эбэтэр үлэһит уола олохтон туораатаҕына — 100 тыһыынча солкуобай көмө бэриллэр.
Соторутааҕыта Интернационалист буойуттар күннэригэр Өлүөхүмэҕэ «Память вечно жива» диэн оҕолор аһымал кэнсиэртэригэр биһиэннэрэ эмиэ кыттыбыттара.

Оҕолор бу кэнсиэртэрэ байыаннай эпэрээссийэ кэмигэр саллаат ытык иэһин чиэстээхтик толорбут Өлүөхүмэ ыччаттарыгар Михаил Андреевка, Александр Петровскайга, Александр Добриновка, Аял Балбаховка, Денис Грязнухиҥҥа, Борис Пшенниковка, Евгений Китчегясовка, Пантелеймон Ивановка
анаабыттара. Бу кэнсиэртэн киирбит 100 тыһыынча солкуобайынан бу саллааттарга кинилэр үөрэммит оскуолаларыгар мемориальнай дуоскалар оҥоһуллан туруоруллуохтара.
«Ойуурдаах куобах охтон биэрбэт” диэн мээнэҕэ этиллибэтин курдук, оскуола кэлэктиибэ, үөрэнээччилэр биир дьойдулаахтарын дьиэ кэргэннэригэр олох-дьаһах кыһалҕатын быһаарыыга көмөлөһөллөр. Оҕолор кылааһынан байыаннай сулууспалаахтар дьонноругар уонна кырдьаҕастарга мас, муус, мас боппуруостарыгар, тиэргэннэрин хаарын ыраастааһыҥҥа уо.д.а. наада буолла даҕаны көмө-ньыма буолаллар. Биһиги бу үлэбитин буолуохтааҕын курдук ылынан, өйүү, көмөлөһө олоробут. Биһиги уолаттарбыт дьоруойдуу хорсун быһыылара, сырдык ааттара умнуллуо суоҕа!