Иннокентий  Тарбаховка аналлаах үөрүүлээх түһүлгэ тэрилиннэ

Бэҕэһээ, муус устар 18 күнүгэр, Нам сэлиэнньэтигэр М.К. Аммосов аатынан култуура уонна духуобунай сайдыы дыбарыаһыгар саха биллиилээх асчыта Иннокентий Иннокентьевич  Тарбаховка аналлаах үөрүүлээх түһүлгэ тэрилиннэ.

Бу күн «Көмүлүөк» хампаанньа  тэриллибитэ 20 сылыгар аналлаах «Сааскы фест – 2025» тэрээһиҥҥэ туой оҥоһугу, маанылаах симэҕи оҥорууга маастар-кылаастар, сахалыы иһит-хомуос, алтан симэх, таҥас-сап, ас-үөл дьаарбаҥката ыытылынна.

Тэрээһин сүрүн чааһынан «Путь шефа» кинигэ сүрэхтэниитэ буолла. Экраҥҥа маастар-асчыт, эргиэн салаатын үтүөлээх үлэһитэ, РФ потребкооперациятын туйгуна, СӨ норуотун хаһаайыстыбатын үтүөлээх үлэһитэ, Таатта уонна Нам улуустарын бочуоттаах олохтооҕо, Алексей Елисеевич Кулаковскай аатынан СӨ Судаарыстыбаннай бириэмийэ лауреата, СӨ бочуоттаах олохтооҕо Иннокентий Иннокентьевич Тарбахов кинигэтин туһунан киирии тылы этиитинэн саҕаланна.

Улуус баһылыгын социальнай боппуруостарга солбуйааччы Егор Протопопов эҕэрдэ тылы эттэ. Иннокентий Тарбахов олоҕун аргыһа, СӨ култууратын туйгуна Антонина Трабахова уонна СӨ ас промышленноһын туйгуна, уопсастыбаннай аһылык менеджерэ, суруналыыс Светлана Львова кинигэ туһунан сырдаттылар, тэрээһин Намҥа ыытыллыбытыгар махтаннылар.
Салгыы Арктикатааҕы агротехнологическай университет профессора, тыа хаһаайыстыбатын билимин доктора, СӨ билимин үтүөлээх деятелэ, СӨ доруобуйа харыстабылын туйгуна  Константин Степанов, СӨ култууратын үтүөлээх үлэһитэ, Нам улууһун Ытык киһитэ Гаврил Местников, «Көмүлүөк» хампаанньа  генеральнай директора, СӨ дьахталларын түмсүүтүн салайааччытын солбуйааччыта, СӨ Уопсастыбаннай  палататын хамыыһыйатын бэрэссэдээтэлэ, «Сделано в Якутии» уопсастыбаннай  холбоһук салайааччыта  Ольга Григорьева – Туналы Урсун уонна Иннокентий Иннокентьевич 80 сааһын көрсө «Асчыт буолар дьылҕам» диэн документальнай киинэ ааптара, СӨ норуотун хаһаайыстыбатын үтүөлээх үлэһитэ, «Пути великих свершений» бырайыак автора, СӨ Ил Дарханын сүбэһитэ Георгий Никонов тыл эттилэр.

«Путь шефа» кинигэ 2500 экземплярынан Новосибирскай куоракка «Дом мира» ХЭТ кинигэ кыһатыгар бэчээттэнэн таҕыста. Кинигэҕэ сэрии оҕото – тулаайах уолчаан олох бары очурдарын туораан саха киэн туттар профессионал асчыта буолан үүнэн тахсыытын туһунан кэпсэнэр. Итэҕэл, эрэл, таптал кынаттарынан уйдаран киһи олоҕун тосту уларытыан, үгүһү ситиһиэн сөбүн туһунан көрдөрөр, дакаастыыр кинигэ буолар. Ону таһынан Иннокентий Иннокентьевич быйыл 81 сааһын томточчу туолбутунан эрдэ хаһан да бэчээккэ тахсыбатах 81 ырыссыаба  киирбит. Кинигэ нууччалыы суруллубут буолан дойдубут араас муннуктарын дьоно-сэргэтэ ааҕан, кырдьык даҕаны, Саха сиригэр талба талааннаах дьон баар эбит диэн сыаналыахтара турдаҕа.

Кинигэ сүрэхтэниитин кэнниттэн «Асчыт буолар дьылҕам» диэн Иннокентий Тарбахов туһунан киинэ буолла.

Киэн туттар биир дойдулаахпыт, саха эрэ барыта киэн тутта ааттыыр улуу, чулуу киһитэ – мааны асчыта Иннокентий Тарбаахап туһунан үйэлэргэ хаалар кинигэ көлүөнэттэн көлүөнэҕэ кэпсэнэ, ахтылла туруоҕа.

«Нам улууһа» МО пресс-сулууспата