Интэринээт-тиэхиньикум үөрэнээччилэрэ аҕам саастаахтары эҕэрдэлээтилэр

М.Н. Донской аатынан инбэлииттэр анал уонна мэдиссиинэ социальнай реабилитациятын өрөспүүбүлүкэтээҕи интэринээт-тиэхиньикумугар Арассыыйа орто анал үөрэхтээһинин систиэмэтин 85 сылыгар уонна Аҕам саастаах дьон күннэригэр анаммыт тэрээһиннэр буолан аастылар.

«Биһиги бииргэбит» диэн көрсүһүү кэмигэр үөрэнээччилэр бэтэрээннэриниин – учуутал Надежда Гороховалыын, быраас Лариса Соломоновалыын, медсестра Евдокия Ферапонтовалыын уонна педагог Капитолина Алексеевалыын көрсүстүлэр. Бу ытык дьон бэйэлэрин уопуттарын үллэстэллэрин таһынан, айар олоххо көхтөөхтүк кытталлар: хоһооннору, ырыалары суруйаллар уонна кэрэхсэбиллээх устуоруйалары кэпсииллэр. Кинилэр чөл уонна көхтөөх олоҕу тарҕатааччынан буолан, эдэр көлүөнэни бэйэлэрин холобурдарыгар үөрэтэллэр.

Бэтэрээннэр бэйэлэрин дьарыктарын туһунан кэпсээтилэр, патриотизм уонна төрөөбүт сиргэ таптал тиэмэлэрин ырытыстылар, оттон көрсүһүү «Мин Сахам сирин таптыыбын» диэн тиэмэҕэ бииргэ хоһоону айыынан түмүктэннэ. Бэлиэ күҥҥэ ону таһынан бочуоттаах ыалдьыттары кытары СӨ Социальнай сайдыытын министириэристибэтин үлэһиттэрэ кытыннылар. Кинилэргэ анаан тиэхиньикумҥа экскурсия тэрилиннэ, онно ыалдьыттарга үөрэх уонна доруобуйаны чөлүгэр түһэрии кэбиниэттэрин, ону таһынан аныгы тэриллэри көрдөрдүлэр.

Тиэхиньикум дириэктэрэ Марина Сивцева Аҕам саастаахтар күннэринэн эҕэрдэлээтэ, бэтэрээннэргэ үөрэх эйгэтин сайдыытыгар киллэрбит кылааттарын иһин махталын биллэрдэ. Тиэхиньикум “Кондитер” салаатыгар үөрэнэр оҕолоро оҥорбут дьоһуннаах бэлэхтэрин – бэйэлэрэ астаабыт бирээнньиктэрин бэлэхтээтилэр. Бырааһынньыгы артыыстар уонна техникум устудьуоннара киэргэттилэр.

Бу күннэргэ Аҕам саастаах дьон декадатын чэрчитинэн тиэхиньикум үлэһиттэрин айар бөлөҕө «Эрчим» кырдьаҕастар күнүскү сытар отделениеларыгар «Тоҥуу хаарга ньургуһуннар» диэн испэктээги көрдөрдүлэр. Искпэктээк сюжета сэрии ыар кэмигэр тыйаатырга олохторун анаабыт эдэр саха ыччатын дьылҕатын туһунан кэпсиир. Аҕам саастаах көрөөччүлэр туруорууну сөбүлээн көрдүлэр, махталларын биллэрдилэр.

Аҕам саастаахтар күннэригэр анаммыт тэрээһиннэр чэрчилэринэн, «Парикмахер» бөлөх устудьуоннара производственнай үөрэхтээһин маастара Сардаана Павлованы кытта бииргэ «Добро рядом» аахсыйа ыыттылар. Кинилэр «Забота» пансионакка олорор аҕам саастаах дьоҥҥо баттахтарын кырыйдылар, оҥордулар. Пансионат олохтоохторо баттахтарын оҥотторон олус астыннылар махталларын эттилэр.

Тиэхиньикум устудьуоннара «Үтүө сурук» аахсыйаҕа эмиэ көхтөөхтүк кытыннылар, кырдьаҕастарга ис сүрэхтэн баҕа санаалардаах аккырыыккалары бэлэмнээн туттардылар. Бу үтүө санаа аккырыыкката аҕам саастаах дьоҥҥо үөрүүнү уонна сылааһы бэлэхтээтэ, кырдьаҕас көлүөнэни уонна ыччат дьону ситимниир үтүө үгэс түстэннэ.