Интернациональнай дьиэ кэргэттэр кэнсиэртээтилэр

Сэтинньи 20 күнүгэр Дьокуускайга А.Е. Кулаковскай аатынан норуоттар доҕордоһууларын дьиэтигэр «Төрөөбүт дойду, Ийэм, Мин» диэн улахан бырааһынньыктааҕы кэнсиэр буолан ааста. Бу туһунан А.Е. Кулаковскай аатынан норуоттар доҕордоһууларын дьиэтэ иһитиннэрэр.

Бу бырагыраама уратытынан Дьокуускай куорат 13 №-дээх оскуолатын «Биир ньыгыл дьиэ кэргэн» интернациональнай кулууп «Төрөөбүт дойду, ийэ уонна мин» оскуола этно-куонкуруһун кыайыылаахтара бэлэмнээбит презентация буолла. Биэс ыал – Жанна Гончарова кыыһынаан Ириналыын (нууччалар), Александра Никитина кыргыттарынаан Сайалыын уонна Айааналыын (сахалар), Эржена Цыбикова кыыһынаан Оюндарилыын (бүрээттэр), Нэлли Геворгян кыргыттарынан Леналаах, Алиналыын (армяннар), Махабат Кабылова кыыһынаан Дианалыын (кыргызтар) – дьиэ кэргэн үгэстэрин уонна бэйэлэрин дойдуларын туһунан кэпсээтилэр.

Дьокуускай куорат 13 №-дээх оскуолатын дириэктэрэ, анал байыаннай дьайыы бэтэрээнэ Иосиф Слепцов, күндү ийэлэри эҕэрдэлээн, дьиэ кэргэн, уопсастыба олоҕор улахан оруолларын тоһоҕолоон бэлиэтээтэ. Национальнай көстүүмнээх үөрэнээччилэри кытта кыттыбыт ийэлэргэ барыларыгар сибэкки дьөрбөтүн туттарда.

Арассыыйа Ийэлэрин күнүгэр аналлаах тэрээһин «Норуоттар ийэ туһунан ыллыыллар» национальнай бэстибээл, «Нуучча тыла фольклортан тыйаатырга диэри» омуктар икки ардыларынааҕы бырайыак чэрчитинэн ыытылынна уонна Саха сиригэр олорор араас омуктар бэрэстэбиитэллэрин биир сыанаҕа түмтэ.

Бу кэнсиэр дьиэ кэргэн сыаннастарын көрдөрөр, норуоттар икки ардыларынааҕы сыһыаны бөҕөргөтөр уонна төрөппүттэргэ ытыктабылы иҥэрэр.